កសិករបារាំង និយាយប្រាប់ទីភ្នាក់ងារព័ត៌មានរ៉យទ័រថា ពួកគេរងផលប៉ះពាល់ដោយសារតម្លៃជីកសិកម្មហក់ឡើងខ្ពស់ បង្កឡើងពីសង្រ្គាមអ៊ីរ៉ង់ ហើយពួកគេគិតរកផ្លាស់ប្តូរប្រភេទដំណាំ ដើម្បីកាត់បន្ថយផលប៉ះពាល់ ។

ការលំបាករបស់ប្រជាកសិករបារាំង ត្រូវបានគេមើលឃើញកើតមានដូចគ្នានៅជុំវិញពិភពលោក ។ អង្គការស្បៀងអាហារ និងកសិកម្មនៃអង្គការសហរដ្ឋប្រជាជាតិ រំពឹងថា ស្រូវសាលី នឹងត្រូវដំាតិច ក្នុងឆ្នាំ ២០២៦នេះ ស្របពេលដែលកសិករប្តូរទៅដាំដំណាំផ្សេងដែលប្រើប្រាស់ជីកសិកម្មតិច ។

លោក Guillaume Lefort ដែលជាកសិករបារាំងវ័យ ៤២ឆ្នាំ ធ្វើជាកសិករអស់រយៈពេល ១៦ឆ្នាំកន្លងមកនេះ ហើយលោកនិយាយថា លោកត្រូវលក់ដំណាំកាន់តែច្រើន ដើម្បីអាចទិញជីកសិកម្មបាន ។

លោក Lefort និយាយថា តាមធម្មតាលោកពឹងផ្អែកលើតម្លៃជីកសិកម្មសកល ដែលបានហក់ឡើងខ្ពស់កប់ពពក ហើយម្យ៉ាងវិញទៀត លោកពឹងផ្អែកលើតម្លៃធុញ្ញជាតិសកលផងដែរ ដែលបែរជាធ្លាក់តម្លៃទៅវិញ ។

សូមបញ្ជាក់ថា តំបន់មជ្ឈិមបូព៌ា គឺជាមជ្ឈមណ្ឌលផលិតជីកសិកម្មឈានមុខគេមួយរបស់ពិភពលោក ហើយភាគច្រើននៃពាណិជ្ជកម្មជីកសិកម្ម ត្រូវធ្វើដំណើរឆ្លងកាត់ច្រកសមុទ្រ Hormuz ដែលជាប់គាំងភាគច្រើនដោយសារសង្រ្គាមអ៊ីរ៉ង់ ៕