ប្រធានាធិបតីអ៊ុយក្រែន លោក Volodymyr Zelenskyy បាននិយាយនៅថ្ងៃចន្ទ (ទី១១ ខែឧសភា ឆ្នាំ២០២៦) នេះថា ទីក្រុងគីវបានពិភាក្សាអំពីលទ្ធភាពដែលអាចមានទម្រង់ សម្រាប់ការចរចាជាមួយប្រធានាធិបតីរុស្ស៊ី លោក Vladimir Putin «នៅកម្រិតភាពជាអ្នកដឹកនាំដែលមានគោលបំណងបញ្ចប់សង្គ្រាមរបស់រុស្ស៊ី»។

លោក Zelenskyy បាននិយាយថា ប្រធានក្រុមចរចារបស់អ៊ុយក្រែន លោក Rustem Umerov បានជម្រាបជូនលោក អំពីកិច្ចប្រជុំជាមួយតំណាងប្រធានាធិបតីអាមេរិក លោក Steve Witkoff និងលោក Jared Kushner។

លោក Zelenskyy បានលើកឡើងនៅលើបណ្ដាញសង្គម X ថា៖ «សំខាន់ជាងនេះទៅទៀត អាមេរិកនៅតែចូលរួមក្នុងការទូត ហើយជាពិសេស បានដើរតួជាអ្នកសម្របសម្រួល លើបញ្ហាដោះដូរអ្នកទោស»។ លោកបានគូសបញ្ជាក់ថា ទំនាក់ទំនងជាមួយសហរដ្ឋអាមេរិក កំពុងបន្ត «នៅក្នុងកម្រិតសមស្រប» ដើម្បីរៀបចំការកំណត់រចនាសម្ព័ន្ធនៃការដោះដូរ។

ជាមួយគ្នានេះ លោក Zelenskyy ក៏បានឲ្យដឹងផងដែរថា លោក Umerov បានផ្តល់របាយការណ៍ ស្តីពីទំនាក់ទំនងជាមួយប្រទេសដែលចាប់អារម្មណ៍ លើកិច្ចព្រមព្រៀងយានដ្រូនជាមួយអ៊ុយក្រែន។ លោកបាននិយាយថា ជិត ២០ប្រទេស កំពុងជាប់ពាក់ព័ន្ធនៅដំណាក់កាលផ្សេងៗគ្នា ដោយមានកិច្ចព្រមព្រៀងចំនួន៤ ត្រូវបានចុះហត្ថលេខារួចហើយ ហើយកិច្ចសន្យាដំបូង កំពុងត្រូវបានរៀបចំ។

គួរបញ្ជាក់ថា លោក Witkoff លោក Kushner និងលោក Umerov បានធ្វើកិច្ចពិភាក្សានៅទីក្រុង Miami កាលពីសប្តាហ៍មុន ជាកន្លែងដែលពួកលោក បានពិភាក្សាអំពីតម្រូវការ ក្នុងការពង្រឹងដំណើរការការទូត និងសម្របសម្រួលជំហានបន្ថែមទៀត ឆ្ពោះទៅរកការសម្រេចបានសន្តិភាព។

កិច្ចប្រជុំនេះបានកើតឡើងចំពេលមានការធ្លាក់ចុះនូវដំណើរការចរចា រវាងទីក្រុងគីវ និងមូស្គូ ខណៈដែលសង្គ្រាមរុស្ស៊ី-អ៊ុយក្រែន ទទួលបានការចាប់អារម្មណ៍ពីអន្តរជាតិតិចជាងមុន ក្នុងរយៈពេលប៉ុន្មានខែថ្មីៗនេះ បន្ទាប់ពីមានសង្គ្រាមអាមេរិក-អ៊ីស្រាអែល លើអ៊ីរ៉ង់៕