បទឈប់បាញ់រយៈពេល ៣ ថ្ងៃរវាងរុស្ស៊ី-​​អ៊ុយក្រែន ស្នើឡើងដោយប្រធានាធិបតីអាមេរិក លោក Donald Trump បានផុតកំណត់នៅ​​​ម៉ោង​ ២១​និង​០០​នាទី​ ​ម៉ោងសកលកាលពី​ថ្ងៃ​ចន្ទ​១១​​ឧសភា​។កាលពី​ថ្ងៃអាទិត្យ​​ ​១០​​ឧសភា ចុងសប្ដាហ៍នេះ ភាគីទាំងពីរបានចោទប្រកាន់គ្នាទៅវិញទៅមកថាបានរំលោភលើបទឈប់បាញ់។

លោក Trump បាននិយាយកាលពីថ្ងៃសុក្រ​សប្ដាហ៍មុន​​​​ថា ទីក្រុងមូស្គូ និងទីក្រុងគី​វ បានយល់ព្រមលើបទឈប់បាញ់សម្រាប់ថ្ងៃទី៩​​ដល់​១១​ខែឧសភា រួមជាមួយនឹងការដោះដូរអ្នកទោស​១.០០០​នាក់ពី​ភាគីទាំងពីរ​​ដោយហៅ​​​សកម្មភាព​​នេះថាជាជំហានដែលអាចធ្វើទៅបាន​​ឆ្ពោះទៅរកការបញ្ចប់សង្គ្រាម។​​​​​​ ​​​

លោកTrump និយាយថា សង្ឃឹមថាការ​​​ផ្អាក​ប្រយុទ្ធ​គ្នា​​ដ៏ខ្លីនេះជាការចាប់ផ្តើមនៃការបញ្ចប់សង្គ្រាមដ៏អូស​បន្លាយ​ ដ៏សាហាវ និងប្រយុទ្ធគ្នាយ៉ាងស្វិតស្វាញ​។ការចរចាកំពុងបន្តលើការបញ្ចប់ជម្លោះដ៏ធំបំផុតចាប់តាំងពីសង្គ្រាមលោកលើកទី២ ហើយពួកលោក​​កំពុងខិតជិត​​​ដល់ជារៀងរាល់ថ្ងៃ។ ​​​​

ការអត្ថាធិប្បាយ​​រប​ស់លោកបានកើតឡើងបន្ទាប់ពី​ប្រេសិត​ពិសេសសហរដ្ឋអាមេរិក លោក Steve Witkoff និងកូនប្រសាររបស់លោក Trump គឺលោក Jared Kushner បានជួបជាមួយប្រធានអ្នកចរចាអ៊ុយក្រែន លោក Rustem Umerov នៅទីក្រុង Miami ដើម្បីពិភាក្សាអំពីការពង្រឹងកិច្ចខិតខំប្រឹងប្រែងផ្នែកការទូត និងសម្របសម្រួលជំហានបន្ថែមទៀតឆ្ពោះទៅរកសន្តិភាព។

ក្រោយមក លោក Zelenskyy បាននិយាយថា ទីក្រុងគី​​វ ​(​Kyiv)បានពិភាក្សាជាមួយសហរដ្ឋអាមេរិកអំពីទម្រង់ដែលអាចធ្វើទៅបានសម្រាប់ការចរចាជាមួយលោក Putin ​នៅកម្រិតថ្នាក់ដឹកនាំដែលមានគោលបំណងបញ្ចប់សង្គ្រាមរបស់រុស្ស៊ី​ ក្នុងអំឡុងពេលដំណើរទស្សនកិច្ចរបស់លោក Umerov ទៅកាន់ទីក្រុង Miami នោះ​​។​​​

មុនសំណើរបស់លោក Trump ទីក្រុងមូស្គូ (Moscow)កាលពីថ្ងៃចន្ទសប្ដាហ៍មុន​ បានប្រកាសពីបទឈប់បាញ់ឯកតោភាគីសម្រាប់ថ្ងៃទី ៨-៩ ​ឧសភា ដើម្បីប្រារព្ធខួប​ជ័យជម្នះរបស់សូវៀតក្នុងសង្គ្រាមលោកលើកទី ២ និងបានព្រមានអ៊ុយក្រែនពីការឆ្លើយតបដោយមីស៊ីលទ្រង់ទ្រាយ​ធំ​​ ប្រសិនបើការប្រារព្ធទិវាជ័យជម្នះ​ត្រូវបានរំខាន។​​​​​​​ ​

ក្រោយមក ទីក្រុងគី​វបាននិយាយថា ខ្លួននឹងគោរពបទឈប់បាញ់ដែលចាប់ផ្តើមនៅពាក់កណ្តាលអធ្រាត្រថ្ងៃទី​​៦​ ខែឧសភា​ស ប្ដាហ៍​មុន​៕