អ៊ុយក្រែន៖ ខណៈកងកម្លាំងរុស្ស៊ីបានបង្កើនការរុលទៅមុខកាលពីថ្ងៃអង្គារ ក្នុងកិច្ចខិតខំប្រឹងប្រែងដណ្ដើមយកតំបន់ភាគខាងត្បូងនៃទីក្រុងកំពង់ផែយុទ្ធសាស្ត្រ Mariupol និងទាហានការពារអ៊ុយក្រែននៅក្នុងភាគខាងកើតប្រទេសនេះ លោកប្រធានាធិបតី Volodymyr Zelenskyy បាននិយាយថា សង្គ្រាមមានអាយុកាល ៧សប្ដាហ៍មកនេះអាចកំពុងបោះជំហានទៅកាន់ដំណាក់កាលថ្មីនៃភាពភ័យខ្លាច សម្រាប់ប្រទេសរបស់លោកដែលក្លាយជាសមរភូមិ និងបានចោទប្រកាន់រុស្ស៊ីពីបទប្រព្រឹត្តឧក្រិដ្ឋកម្មសង្គ្រាមជាថ្មីទៀត។
ទន្ទឹមនឹងនោះប្រធានាធិបតីរុស្ស៊ីលោក Vladimir Putin បាននិយាយថា គ្មានការសង្ស័យទេថា ទីក្រុង Moscow នឹងសម្រេចបាននូវគោលបំណងរបស់ខ្លួននៅក្នុងប្រទេសអ៊ុយក្រែន ហើយបានការពារបំណងប្រាថ្នាបង្កឲ្យមានការវាយប្រហារ ដែលធ្វើឲ្យប្រទេសជាច្រើនលើពិភពលោកថ្កោលទោសថា ជារឿងដ៏រន្ធត់។ រុស្ស៊ីបានស្ដីបន្ទោសអ៊ុយក្រែនថា ជាដើមហេតុធ្វើឲ្យការចរចាសន្តិភាពត្រូវបានជាប់គាំង។ ក្រុមមន្ត្រីយោធាលោកខាងលិច និងអ៊ុយក្រែនកំពុងព្យាយាមបញ្ជាក់ថា តើរុស្ស៊ីបានប្រើ ឬមានបំណងប្រើប្រាស់អាវុធគីមីជាជម្រើសចុងក្រោយ ដើម្បីដណ្ដើមកាន់កាប់ទីក្រុង Mariupol ឬយ៉ាងណា។ មេដឹកនាំផ្ដាច់ខ្លួនគាំទ្រដោយរុស្ស៊ីដែលកន្លងមក បានគំរាមប្រើប្រាស់អាវុធគីមីបានបដិសេធកាលពីថ្ងៃអង្គារដែលថា គ្រាប់បែកប្រភេទនេះត្រូវបានដាក់ពង្រាយ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
