ក្រុម​មន្ត្រីមូលដ្ឋាន​​​បានរាយការណ៍ថា​ ​កងកម្លាំងរុស្ស៊ីបានបន្តការវាយប្រហារលើទីក្រុងគីវ (​Kyiv )នៅយប់ថ្ងៃចន្ទ​ឈានចូល​ថ្ងៃអង្គារ​ទី ១២ ខែឧសភានេះ  ​​​ដោយយានដ្រូនរាប់សិបគ្រឿងឆ្ពោះទៅរដ្ឋធានី និងវាយប្រហារអគារលំនៅឋាន​​មួយនៅក្នុងទីក្រុងនេះ​ ។ ​​ ​​

ការវាយប្រហារចុងក្រោយបំផុតលើរដ្ឋធានីអ៊ុយក្រែន ​បានកើតឡើងត្រឹមតែប៉ុន្មានម៉ោងប៉ុណ្ណោះបន្ទាប់ពីបទឈប់បាញ់បណ្ដោះអាសន្ន​សម្របសម្រួលដោយសហរដ្ឋអាមេរិករវាងអ៊ុយក្រែន និងរុស្ស៊ីបានផុតកំណត់។

សំឡេងផ្ទុះត្រូវបានឮជាលើកដំបូងនៅក្នុងរដ្ឋធានីនៅម៉ោងប្រហែល ​៣​និង​​​៣៥​​នាទី​ ព្រឹកម៉ោងក្នុងស្រុក នេះបើយោងតាមអ្នក​សារព័ត៌មាន​ ​របស់​​ Kyiv Independent នៅអ៊ុយក្រែន​។

ប៉ុន្មាននាទីក្រោយមក ប្រធានរដ្ឋបាលយោធាទីក្រុងគី​វ លោក Tymur Tkachenko បានរាយការណ៍ថា បំណែកយានដ្រូន​​បានធ្លាក់​​​លើ​​ដំបូលអគារលំនៅឋាន​​កម្ពស់​២០​ជាន់នៅក្នុងសង្កាត់​ Obolon នៃទីក្រុងនេះ ។ រូបភាព​ដែលបានបង្ហោះនៅលើប្រព័ន្ធផ្សព្វផ្សាយសង្គម ​បង្ហាញពីភ្លើងឆេះចេញពីដំបូលអគារនោះ។

មុនពេលការវាយប្រហារ កងទ័ពអាកាសអ៊ុយក្រែនបានព្រមានអំពីការវាយប្រហារ​ដោយ​យានដ្រូន​ រាប់សិបគ្រឿង ​កំពុង​​សំដៅ​មកលើ​ទីក្រុងនេះ។ ​​​​​​

វិសាលភាពនៃការខូចខាតដែលបង្កឡើងដោយ​​​យានដ្រូន​ទាំងនោះ​នៅពុំ​​ទាន់ច្បាស់លាស់ភ្លាមៗនោះទេ។ រុស្ស៊ីវាយប្រហារទីក្រុង និងហេដ្ឋារចនាសម្ព័ន្ធស៊ីវិលអ៊ុយក្រែនជាប្រចាំ ខណៈ​សង្គ្រាម​នៅតែ​ពុំ​មានសញ្ញា​បញ្ចប់​៕