ប៉ាគីស្ថានបានកោះអញ្ជើញ​​​អ្នកការទូតជាន់ខ្ពស់អាហ្វហ្គានីស្ថានមួយ​រូប​​កាលពីថ្ងៃចន្ទ ១១ ឧសភា សប្ដាហ៍នេះ​ ដើម្បីដាក់ពាក្យបណ្តឹងជាផ្លូវការលើការវាយប្រហារអត្តឃាតនៅភាគពាយ័ព្យប្រទេស ជាប់ព្រំដែនជាមួយអាហ្វហ្គានីស្ថាន ដែលបានសម្លាប់មន្ត្រីនគរបាល​ ១៥ នាក់។

ទីក្រុង​ Islamabad បានស្តីបន្ទោ​សការវាយប្រហារកាលពីយប់ថ្ងៃសៅរ៍ទៅលើក្រុមតាលីបង់ប៉ាគីស្ថាន ដែលត្រូវបានគេស្គាល់ថាជា Tehrik-e-Taliban Pakistan ឬ TTP។ក្រុម​​អាជ្ញាធរប៉ាគីស្ថានបានចោទ​ប្រកាន់រដ្ឋាភិបាលតាលីបង់ជាយូរមកហើយថាបានផ្តល់ជម្រកដល់ ក្រុម​ ​TTP ដែលជាក្រុមដាច់ដោយឡែកមួយ ប៉ុន្តែមានសម្ព័ន្ធភាពជិតស្និទ្ធជាមួយក្រុម​តាលីបង់អាហ្វហ្គានីស្ថាន។ ​ទីក្រុ​ង​ ​Kabul បដិសេធការចោទប្រកាន់នេះ ដោយនិយាយថាខ្លួនពុំ​​អនុញ្ញាតឱ្យក្រុម​​សកម្មប្រយុទ្ធនោះ ​ប្រើប្រាស់ដីអាហ្វហ្គានីស្ថានដើម្បីវាយប្រហារប្រទេសដទៃទៀតឡើយ​។ ​

ក្រសួងការបរទេសប៉ាគីស្ថានបាននិយាយនៅក្នុងសេចក្តីថ្លែងការណ៍មួយថា ពាក្យបណ្តឹងនេះត្រូវបានប្រគល់ជូនភារធារីអាហ្វហ្គានីស្ថាន ដោយបន្ថែមថា ការស៊ើបអង្កេតលម្អិតអំពីឧបទ្ទវហេតុនេះ រួមជាមួយនឹងភស្តុតាងដែលប្រមូលបាន និងចារកម្មបច្ចេកទេស​ បានបង្ហាញថា ការវាយប្រហារនេះត្រូវបាន​រៀបចំឡើងដោយពួក​​ភេរវករដែលរស់នៅក្នុងប្រទេសអាហ្វហ្គានីស្ថាន។

សេចក្តីថ្លែងការណ៍នេះក៏បាននិយាយ​ផងដែរ​ថា​ ​ទីក្រុង​ ​ Islamabad ​រក្សាសិទ្ធិក្នុងការឆ្លើយតបយ៉ាងម៉ឺងម៉ាត់ប្រឆាំងនឹងជនល្មើសនៃទង្វើព្រៃផ្សៃនេះ​។ មិនមានការអត្ថាធិប្បាយភ្លាមៗពីទីក្រុង​ Kabulទេ។

​ការវាយប្រហារនៅទីក្រុ​ង​​ Bannu ជាស្រុកមួយក្នុងខេត្ត Khyber Pakhtunkhwa បានផ្ទុះឡើងបន្ទាប់ពីជន​បំផ្ទុះគ្រាប់បែកអត្តឃាតម្នាក់ ដែលមានការគាំទ្រពីក្រុម​ខ្មាន់កាំភ្លើងជាច្រើននាក់ បានបំផ្ទុះរថយន្តផ្ទុកគ្រឿងផ្ទុះមួយគ្រឿងនៅជិតប៉ុស្តិ៍សន្តិសុខ ​​​បង្កឱ្យមានការបាញ់ប្រហារគ្នា។ យោងតាមនគរបាល​​​ក្នុងតំបន់ មន្ត្រីមួយចំនួនត្រូវបានសម្លាប់ក្នុងការបាញ់ប្រហារតបត​គ្នា ខណៈ​មន្ត្រីមួយចំនួនទៀតបានស្លាប់បន្ទាប់ពីផ្នែកខ្លះនៃអគារបានដួលរលំ។ មនុស្សបួននាក់ក៏បានរងរបួសផងដែរ៕