ភ្នំពេញ៖ មកដល់ពេលនេះ គ្រប់សណ្ឋាគារ ផ្ទះសំណាក់ និងផ្ទះស្នាក់ជាដើម ដែលនៅតាមខេត្តគោលដៅទេសចរណ៍សំខាន់ៗ ទាំងអស់នៅទូទាំងប្រទេស ត្រូវបានភ្ញៀវធ្វើការកក់បន្ទប់ស្នាក់ស្ទើតែទាំងអស់ ដើម្បីត្រៀមទៅស្នាក់នៅដើរលេងកម្សាន្ត នៅក្នុងឱកាសថ្ងៃបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានចូលមកដល់នៅថ្ងៃស្អែកទី១៤ រហូតដល់ថ្ងៃទី ១៦ខែមេសានេះ។

ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានថ្លែងប្រាប់ BTV នៅថ្ងៃទី១៣ ខែមេសានេះថា បន្ទប់ស្នាក់សណ្ឋាគារ ​និងផ្ទះសំណាក់ នៅតាមខេត្តគោលដៅ​ទេសចរណ៍ធំៗ​មានដូចជា ខេត្តព្រះសីហនុ កំពត និងខេត្តកែប និងខេត្តមណ្ឌលគិរីជាដើម មក​ដល់ពេលនេះ​ គឺមាន​កក់ពេញអស់ហើយ ​។ ដោយឡែកគ្រប់សណ្ឋាគារ និងផ្ទះសំណាក់នៅ​ខេត្តសៀមរាបវិញ ​ស្ទើគ្រប់១០០% ​គឺទទួល​បានការកក់បន្ទប់ស្នាក់ពីភ្ញៀវ ​ប៉ុន្តែម្ចាស់សណ្ឋាគារ និងផ្ទះសំណាក់នានា ​ក៏មានការរក្សាទុកបន្ទប់ស្នាក់ប្រមាណ១០ទៅ១៥%​ មិនអោយភ្ញៀវកក់មុន ដើម្បីទុកត្រៀម​ទទួលភ្ញៀវថ្មីទៀត​ ដែលនឹងទៅស្វែងរកបន្ទប់ស្នាក់នៅថ្ងៃបុណ្យចូលឆ្នាំថ្មី។

ទោះយ៉ាងណាសម្រាប់បន្ទប់ស្នាក់ដែលម្ចាស់សណ្ឋាគារ និងផ្ទះសំណាក់រក្សាទុកសម្រាប់​ជួលជូន​ភ្ញៀវ​នៅក្នុងឱកាសថ្ងៃបុណ្យចូលឆ្នាំនោះ ​ឯកឧត្តម តុប សុភ័ក ​បានប្រកាសកុំ​អោយមានការដំឡើង​ថ្លៃហួសពីតារាង​តម្លៃដែលម្ចាស់អាជីវកម្មបាន​កំណត់​នៅក្នុងតារាងតម្លៃ ហើយបើមានដំឡើងថ្លៃខុស​ប្រក្រតីនោះ ​ឯកឧត្តម ក៏បានស្នើ​អោយភ្ញៀវត្រូវរាយការណ៍ទៅអាជ្ញាធរមានសមត្ថកិច្ច​ដើម្បី​ចាត់វិធាន​ការតាមផ្លូវច្បាប់។

បើតាមលោកស្រី ឆាយ សៀវលីន ប្រធានសមាគមន៍ទីភ្នាក់ទេសចរណ៍កម្ពុជា ថ្លែងថា ជាទូទៅ​នៅក្នុងឱកាសថ្ងៃបុណ្យចូលឆ្នាំថ្មី បណ្តាភ្ញៀវទេសចរជាតិ​ ភាគច្រើន គឺមិនចង់ដើរកម្សាន្ត​ទស្សនា​កម្ពុជា តាមរយៈការទិញកញ្ចប់ទេសចរណ៍នោះទេ ប៉ុន្តែគ្រប់បណ្តាភ្ញៀវស្ទើតែទាំងអស់ បាន​ប្រើប្រាស់​ក្រុមហ៊ុនការីទេសចរណ៍​អោយធ្វើការកក់តែបន្ទប់ស្នាក់​នៅនៅ​តាម​បណ្តា​បណ្ឋាគារ​លំដាប់​ផ្កាយ ដើម្បីទៅស្នាក់ ​និងដើរកម្សាន្តថ្ងៃបុណ្យចូលឆ្នាំតែប៉ុណ្ណោះទេ។

លោកស្រី ឆាយ សៀវលីន បន្តថា សម្រាប់​ភ្ញៀវទេសចរអន្តរជាតិអញ្ជើញ​មកដើរកម្សាន្តកម្ពុជា​តាម​កញ្ចប់ទេសចរណ៍ក៏មិនទាន់មានច្រើនខ្លាំងនោះដែរ ដោយសារថ្ងៃបុណ្យចូលឆ្នាំនេះបានធ្វើឡើង​ចំរដូវភ្ញៀវអន្តរជាតិចេញដើរកម្សាន្តតិច ។ ដោយឡែកភ្ញៀវអន្តរជាតិដែលយើងឃើញ​ដើរ​កម្សាន្តជាលក្ខណៈបុគ្គល ​ឬលក្ខណៈគ្រួសារ ​ភាគច្រើនជាភ្ញៀវមានស្រាប់នៅក្នុងស្រុក និង​ជា​ភ្ញៀវមកពីបណ្តាប្រទេសក្នុងតំបន់អាស៊ាន ​មកទស្សនាកម្ពុជា ​ខណៈកម្ពុជា​ បើកធ្វើVISA On ARRIVALឡើងវិញ៕ អត្ថបទ ស៊ុម សុខជា