អាជ្ញាធរទីក្រុង Mexico City ប្រទេសម៉ិកស៊ិកបានដាក់ឱ្យដំណើរការឡើងវិញជាផ្លូវការ នូវខ្សែរថភ្លើង Light Rail ដែលត្រូវបានជួសជុល និងអភិវឌ្ឍថ្មី កាលពីថ្ងៃចន្ទ ទី១១ ខែឧសភា ដែលគម្រោងនេះត្រូវបានចាត់ទុកថា ជាផ្នែកសំខាន់មួយសម្រាប់ការត្រៀមទទួលព្រឹត្តិការណ៍បាល់ទាត់ពិភពលោក FIFA World Cup 2026។

យោងតាមអភិបាលក្រុងលោកស្រី Clara Brugada ការកែលម្អប្រព័ន្ធដឹកជញ្ជូននេះ រួមមានការបន្ថែមរថភ្លើងអគ្គិសនីថ្មីចំនួន ១៧ គ្រឿង ដែលធ្វើឱ្យចំនួនរថភ្លើងសរុបកើនដល់ ៣៥ គ្រឿង។ គម្រោងនេះនឹងជួយបង្កើនសមត្ថភាពដឹកអ្នកដំណើរប្រចាំថ្ងៃពីប្រមាណ ១៣០,០០០ នាក់ ទៅដល់ ២៥០,០០០ នាក់។

ខ្សែរថភ្លើង Light Rail នេះនឹងតភ្ជាប់តំបន់ភាគខាងត្បូងទីក្រុងចាប់ពី Tasquena ទៅកាន់ Xochimilco ហើយក៏មានស្ថានីយ៍ឆ្លងកាត់កីឡដ្ឋាន Banorte ដែលជាកីឡដ្ឋានមួយទទួលការប្រកួត World Cup ផងដែរ។

សូមបញ្ជាក់ថាកីឡដ្ឋាន Azteca ដែលបច្ចុប្បន្នត្រូវបានគេស្គាល់ក្នុងឈ្មោះថ្មីថា Banorte Stadium កំពុងបន្តការជួសជុល និងកែលម្អហេដ្ឋារចនាសម្ព័ន្ធ ដើម្បីត្រៀមទទួលព្រឹត្តិការណ៍បាល់ទាត់ដ៏ធំបំផុតរបស់ពិភពលោក។

ការប្រកួត World Cup ឆ្នាំ ២០២៦ គ្រោងនឹងចាប់ផ្តើមនៅថ្ងៃទី១១ ខែមិថុនា ឆ្នាំ២០២៦ ដោយម៉ិកស៊ិកជាប្រទេសមួយក្នុងចំណោមម្ចាស់ផ្ទះរួមជាមួយសហរដ្ឋអាមេរិក និងកាណាដា៕ អត្ថបទ៖នាង​ សុភាវុធ