កាលពី ១ឆ្នាំមុន ប្រធានាធិបតីអាមេរិក លោក Donald Trump បានព្យាករថា អត្រាពន្ធពាណិជ្ជកម្មដ៏ខ្ពស់ នឹងនាំឲ្យគូប្រជែងសេដ្ឋកិច្ចដ៏សំខាន់របស់សហរដ្ឋអាមេរិកព្រមចុះចាញ់។

អ្នកវិភាគនយោបាយ លើកឡើងថា លោក Trump នឹងធ្វើដំណើរទៅកាន់ប្រទេសចិន នៅសប្តាហ៍នេះ ជាមួយនឹងមហិច្ឆតានោះ ប៉ុន្តែវាត្រូវបានកាត់បន្ថយដោយសេចក្តីសម្រេចរបស់តុលាការ ពោលគឺបានបង្រួមគោលដៅរបស់លោកឲ្យមកត្រឹមតែជាកិច្ចព្រមព្រៀងមួយចំនួន ពាក់ព័ន្ធសណ្តែក សាច់គោ និងយន្តហោះរបស់ក្រុមហ៊ុន Boeing ខណៈដែលរូបលោកព្យាយាមឲ្យមានការពាក់ព័ន្ធពីទីក្រុងប៉េកាំង ដើម្បីជួយដោះស្រាយសង្គ្រាមអ៊ីរ៉ង់ដែលមិនទទួលបានការគាំទ្ររបស់លោក។

យោងតាមអ្នកវិភាគនានា បានឲ្យដឹងថា ការរំពឹងទុកតិចតួច សម្រាប់កិច្ចប្រជុំថ្ងៃព្រហស្បតិ៍ និងថ្ងៃសុក្រ (ទី១៤ និងទី១៥ ខែឧសភា ឆ្នាំ២០២៦) របស់លោក Trump ជាមួយមេដឹកនាំចិន លោក ស៊ី ជីនពីង (Xi Jinping) ដែលជាជំនួបកំពូលលើកដំបូង ចាប់តាំងពីភាគីទាំង២ បានផ្អាកសង្គ្រាមពាណិជ្ជកម្មដ៏ខ្លាំងក្លា កាលពីខែតុលាឆ្នាំមុន គូសបញ្ជាក់ថា តើវិធីសាស្រ្តដ៏គួរឲ្យភ្ញាក់ផ្អើលរបស់លោក Trump បានបរាជ័យក្នុងការផ្តល់ភាពមានប្រៀបយ៉ាងដូចម្ដេច មុនពេលមានកិច្ចពិភាក្សា។

លោក Alejandro Reyes សាស្ត្រាចារ្យឯកទេសខាងគោលនយោបាយការបរទេសចិន នៅសាកលវិទ្យាល័យហុងកុង (University of Hong Kong) បាននិយាយថា លោក Trump «ត្រូវការប្រទេសចិនច្រើនជាងប្រទេសចិនត្រូវការគាត់»។ លោក Reyes បានបន្ថែមថា «លោក Trump ត្រូវការជ័យជម្នះគោលនយោបាយការបរទេស ពោលគឺជាជ័យជម្នះដែលបង្ហាញថា លោកកំពុងស្វែងរកការធានាស្ថិរភាព នៅក្នុងពិភពលោក និងបង្ហាញថា លោកមិនត្រឹមតែរំខានដល់នយោបាយពិភពលោកប៉ុណ្ណោះទេ»។

ចាប់តាំងពីមានកិច្ចប្រជុំរយៈពេលខ្លីចុងក្រោយរបស់ថ្នាក់ដឹកនាំកំពូលទាំង២ នៅឯមូលដ្ឋានទ័ពអាកាសមួយ ក្នុងប្រទេសកូរ៉េខាងត្បូង ជាកន្លែងដែលលោក Trump បានផ្អាកអត្រាពន្ធកម្រិត ៣ខ្ទង់ លើទំនិញរបស់ចិន ហើយលោក Xi បានបញ្ឈប់វិធានការមិនផ្គត់ផ្គង់រ៉ែកម្រទូទាំងពិភពលោក ប្រទេសចិនបានធ្វើឲ្យឧបករណ៍សម្ពាធសេដ្ឋកិច្ចរបស់ខ្លួនដែលផ្តោតលើទីក្រុងវ៉ាស៊ីនតោនកាន់តែមានឥទ្ធិពល៕