អង្គការសហប្រជាជាតិ​បានរាយការណ៍​នៅថ្ងៃអង្គារ​​ទី​១២​​ឧសភានេះ ​ថា ជនស៊ីវិល​​អាហ្វហ្គានីស្ថាន​​​យ៉ាង​​ហោចណាស់​​៣៧២​​​ ​​បានស្លាប់​​​ក្នុងជម្លោះ​​រវាង​​កងកម្លាំង​រដ្ឋាភិបាល​ ​​និង​​ប៉ាគីស្ថាន​ ​​​ក្នុង​រយៈពេល​៣​ខែ​ដំបូង​​​នៃឆ្នាំនេះ ​​ក្នុង​នោះ​ ការស្លាប់ជាងពាក់កណ្ដាល​​ដោយសារ​ការវាយ​ប្រហារ​​តាមអាកាស​លើ​​មជ្ឈមណ្ឌល​​​ព្យាបាល​​អ្នកញៀន​ថ្នាំ​ ក្នុង​ទីក្រុង​​ ​ Kabul។ ​ ​​

ទំនាក់​ទំនង​​រវាង​​ទីក្រុង​ Islamabad​ និង​Kabul ​​​បាន​​ដុនដាបខ្លាំង ចាប់តាំងពី​​ក្រុមតាលីបង់​​បាន​ត្រឡប់ទៅកាន់អំណាច​វិញ​​ ​​ក្នុង​ឆ្នាំ​​​២០២១​ ​​និង​​​​បាន​ផ្ទុះឡើង​នូវអ្វីដែល​​​​រដ្ឋមន្ត្រីការពារជាតិ​​​ប៉ាគីស្ថាន​​ បានហៅថា​ជា​សង្គ្រាមបើកចំហរ​ ​ក្នុងខែ​​កុម្ភៈ​​ឆ្នាំ​២០២៦​​នេះ​។ ​​

ទីក្រុង​ Islamabad ​បានចោទ​ប្រកាន់​​រដ្ឋាភិបាល​​តាលីបង់​​អាហ្វហ្គានីស្ថាន ​​ពី​បទ​ផ្ដល់​ទីជម្រក​ដល់​​​ក្រុមសកម្មប្រយុទ្ធ​ដែល​នៅពីក្រោយការវាយប្រហារ​ចេះតែ​កើនឡើង​ ​ពិសេស​ ក្រុម​​ប៉ាគីស្ថានតាលីបង់​ (Pakistan Taliban) ដែលបានបង្កើតយុទ្ធនាការ​​​ហិង្សា​​​រយៈពេលជាច្រើនឆ្នាំមក​នេះ​ ។ ​​  ​

មន្ត្រីអាហ្វហ្គានីស្ថានបដិសេធការចោទប្រកាន់នេះ ហើយបានឆ្លើយតបថា ប៉ាគីស្ថានផ្តល់ជម្រកដល់ក្រុមអរិភាព និងមិនគោរពអធិបតេយ្យភាពរបស់ខ្លួន។

បេសកកម្មជំនួយរបស់អង្គការសហប្រជាជាតិប្រចាំប្រទេសអាហ្វហ្គានីស្ថាន (UNAMA) បាននិយាយថា ចន្លោះពីថ្ងៃទី១ ខែមករា ដល់ថ្ងៃទី៣១ ខែមីនា ឆ្នាំ ២០២៦ UNAMA បានកត់ត្រាចំនួនជនស៊ីវិលសរុប​៣៧២ នាក់ត្រូវបានសម្លាប់ និង៣៩៧ នាក់រងរបួស ព្រោះអំពើហិង្សាប្រដាប់អាវុធឆ្លងព្រំដែន រវាងកងកម្លាំងសន្តិសុខអាហ្វហ្គានីស្ថាន និងកងកម្លាំងយោធាប៉ាគីស្ថាន។ ​ ​

នៅក្នុងការឆ្លើយតបជាលាយលក្ខណ៍អក្សរចំពោះរបាយការណ៍នេះ ប៉ាគីស្ថាន​ ​បាននិយាយថា ជនស៊ីវិល និងបុគ្គលិកសន្តិសុខប៉ាគីស្ថានចំនួន១៣០​ នាក់ត្រូវបានសម្លាប់ចាប់តាំងពីដើមឆ្នាំនេះ៕