នៅក្នុងឃ្លាំងវេចខ្ចប់ផលិតផលស្រស់ដ៏មមាញឹកមួយស្ថិតនៅទីក្រុងភាគខាងជើង Harare របស់ប្រទេសស៊ីមបាបវ៉េ ស្រ្តីប្រហែល ៣០នាក់ កំពុងរៀបចំវេចខ្ចប់សណ្តែកបារាំង ដែលនឹងត្រូវដឹកជញ្ជូនទៅកាន់អឺរ៉ុប ។

បរិយាកាសនៅក្នុងឃ្លាំងវេចខ្ចប់របស់ក្រុមហ៊ុន Kuminda មានសភាពស្រស់ស្រាយ ប៉ុន្តែក្នុងពេលតែមួយ ពួកគេពុំអាចនិយាយពីការចាប់ផ្តើមរដូវនាំចេញផលិតផលស្រស់បាននោះទេ ក្រោយថ្លៃដឹកជញ្ជូនហក់ឡើងខ្ពស់ ដោយសារជម្លោះនៅក្នុងប្រទេសអ៊ីរ៉ង់ ។

ជម្លោះបានផ្ទុះឡើង ស្របពេលដែលក្រុមហ៊ុន Kuminda គឺជាក្រុមហ៊ុនប្រមូលផលិតផលពីគ្រួសារខ្នាតតូចប្រហែល ៥ពាន់គ្រួសារ ដែលភាគច្រើនជាស្រ្តីកសិករ ត្រៀមខ្លួនដឹកជញ្ជូនសណ្តែកបារាំងលើកដំបូងរបស់ខ្លួនទៅកាន់អឺរ៉ុប ។

ក្រុមហ៊ុន Kuminda នឹងត្រូវចំណាយប្រាក់ ៣,៨០ដុល្លារ ក្នុងសណ្តែក ១គ.ក ដើម្បីនាំចេញទៅកាន់ទីផ្សារអឺរ៉ុប ក្នុងឆ្នាំនេះ ពោលគឺហក់ឡើងពីតម្លៃ ២-២,២០ដុល្លារ ក្នុង ១គ.ក កាលពីឆ្នាំមុន ។

លោក Clarence Mwale គឺជាប្រធានប្រតិបត្តិក្រុមហ៊ុន Kuminda និយាយប្រាប់ទីភ្នាក់ងារព័ត៌មានរ៉យទ័រថា ដើម្បីនាំផលិតទៅដល់ទីក្រុងឡុងដ្រ៍ របស់ចក្រភពអង់គ្លេស និងទីក្រុង Amsterdam របស់ហូឡង់ គឺត្រូវការចំណាយច្រើនជាងមុនក្នុងឆ្នាំនេះ ។ នេះគឺដោយសារតែតម្លៃប្រេងហក់ឡើងខ្ពស់ ហើយជម្រើសមានដែនកំណត់ សម្រាប់ក្រុមហ៊ុនអាកាសចរណ៍ ដោយសារតែជម្លោះ ៕