អ៊ីស្រាអែល បានវាយប្រហារនៅភាគខាងត្បូងប្រទេសលីបង់កាលពីថ្ងៃអង្គារ ទី ១២ ខែឧសភា មុនពេលកិច្ចចរចារវាងប្រទេសទាំងពីរនៅទីក្រុងវ៉ាស៊ីនតោន ខណៈទីក្រុងបេរូត បានរាយការណ៍ថាមនុស្ស ៣៨០ នាក់បានស្លាប់នៅក្នុងការវាយប្រហាររបស់អ៊ីស្រាអែល ចាប់តាំងពីបទឈប់បាញ់នៅថ្ងៃទី ១៧ ខែមេសា ចូលជាធរមាន។

លោក Naim Qassem មេដឹកនាំក្រុមហេសបូឡា បានប្តេជ្ញាថានឹងប្រែក្លាយសមរភូមិទៅជា «ឋាននរក» សម្រាប់កងកម្លាំងអ៊ីស្រាអែល និងបានទទូចថា អាវុធរបស់ក្រុមដែលគាំទ្រដោយអ៊ីរ៉ង់របស់លោក នឹងមិនត្រូវបានលើកមកពិភាក្សានៅក្នុងកិច្ចចរចានៅថ្ងៃព្រហស្បតិ៍ និងថ្ងៃសុក្រនោះទេ បន្ទាប់ពីសហរដ្ឋអាមេរិកបានអំពាវនាវឱ្យមានការរំសាយអាវុធ។

អ៊ីស្រាអែល បានបង្កើនការវាយប្រហាររបស់ខ្លួននៅភាគខាងត្បូងប្រទេសលីបង់ ជាកន្លែងដែលអ៊ីស្រាអែល បន្តបាញ់តគ្នាជាមួយក្រុមហេសបូឡា ទោះបីជាមានបទឈប់បាញ់ក៏ដោយ។ ក្រោមលក្ខខណ្ឌនៃបទឈប់បាញ់ដែលចេញដោយទីក្រុងវ៉ាស៊ីនតោន អ៊ីស្រាអែលរក្សាសិទ្ធិក្នុងការធ្វើសកម្មភាពប្រឆាំងនឹងការគំរាមកំហែងដែលនឹងមកដល់។

ក្រសួងសុខាភិបាលលីបង់ បាននិយាយថា ការវាយប្រហាររបស់អ៊ីស្រាអែលកាលពីថ្ងៃអង្គារ បានសម្លាប់មនុស្ស ១៣ នាក់នៅភាគខាងត្បូង រួមទាំងអ្នកជួយសង្គ្រោះពីរនាក់ដែលកំពុងឆ្លើយតបទៅនឹងការវាយឆ្មក់នៅក្នុងទីក្រុង Nabatieh និងមនុស្សម្នាក់បានរងរបួសដែលពួកគេបានចូលទៅជួយសង្គ្រោះ។ ក្រសួងបានរិះគន់ ការមិនអើពើទាំងស្រុងចំពោះបទដ្ឋានអន្តរជាតិ របស់អ៊ីស្រាអែល។

រដ្ឋមន្ត្រីក្រសួងសុខាភិបាលលីបង់ បាននិយាយក្នុសន្និសីទសារព័ត៌មានកាលពីថ្ងៃអង្គារថា ចាប់តាំងពីបទឈប់បាញ់មក «មនុស្ស ៣៨០នាក់ត្រូវបានសម្លាប់ និង១.១២២នាក់រងរបួស»។ មន្ត្រីក្រសួងម្នាក់ បាននិយាយថា ចំនួនអ្នកស្លាប់រួមមានស្ត្រី ៣៩ នាក់ និងកុមារ ២២នាក់។