មណ្ឌលគិរី៖ នៅថ្ងៃនេះ មន្ត្រីបរិស្ថានខេត្តមណ្ឌលគិរី សហការគ្នាជាមួយកម្លាំងកងរាជអាវុធហត្ថ អាជ្ញាធរក្រុងសែនមនោរម្យ និងក្រុមយុវជន (សសយក) នាំគ្នារើសសំរាមសម្អាតតំបន់​ទេសចរណ៍​ក្នុងបរិវេណក្រុងសែនមនោរម្យ ពិសេសតាមបណ្ដោយផ្លូវជាតិលេខ៧៦ ចំណុចចម្ការស្រល់ ដែល​ជាតំបន់ទេសចរណ៍ដ៏ពេញនិយមមួយ ដើម្បីសោភ័ណភាព និងរក្សាអនាម័យជូនអ្នកទេសចរ ដែលនឹងចូលទៅកម្សាន្តច្រើន នាឱកាសបុណ្យចូលឆ្នាំថ្មី។

ប្រធានមន្ទីរបរិស្ថានខេត្តមណ្ឌលគិរី លោក កែវ សុភក៌ បានលើកឡើងថា ដោយ​មានការណែនាំ​របស់​ឯកឧត្ដមអភិបាលខេត្តមណ្ឌលគិរី​ ឲ្យមានការសម្អាតទីក្រុង ​ពិសេសគឺតំបន់រមណីយដ្ឋាន មន្ត្រីជំនាញ​មកពីមន្ទីរបរិស្ថាន ​តំបន់ការពារសត្វព្រៃ​ កម្លាំងកងរាជអាវុធហត្ថ អាជ្ញាធរក្រុងសែន​មនោរម្យ ​និងក្រុមយុវជន (សសយក) បានរួមគ្នាជាកម្លាំងដើម្បីសម្អាតក្រុងសែមនោរម្យ ត្រៀម​ទទួល​ភ្ញៀវទេសចរ ដែលចាប់ពីចំណុចចម្ការស្រល់រហូតដល់សួនច្បារនៅក្នុងក្រុង។

អភិបាលក្រុងសែនមនោរម្យ លោក ហៀក សុផាន ក៏បានសំណូមពរទៅដល់ប្រជាពលរដ្ឋក្នុងខេត្ត និងភ្ញៀវទេសចរដែលនឹងចូលទៅលេងកម្សាន្តក្នុងពិធីបុណ្យចូលឆ្នាំប្រពៃណីជាតិ សូមចូលរួម​ថែរក្សា​បរិស្ថានទាំងអស់គ្នា ​ដោយការវេចខ្ចប់សំរាមដែលសេសសល់​ ដាក់ក្នុងធុងសំរាមនានា ដែល​មានដាក់នៅបរិវេណសាធារណៈ ព្រោះបើអ្នកទាំងអស់គ្នាចូលរួមសម្អាតបរិស្ថាន នោះសំរាម នឹងមិនមាននោះទេ ។

ក្រុងសែមនោរម្យ ខេត្តមណ្ឌលគិរី ​ជាកន្លែងទាក់ទាញភ្ញៀវទេសចរឲ្យចូលកម្សាន្តច្រើន ប៉ុន្តែ​ទន្ទឹម​នេះ ​ភ្ញៀវទេសចរមួយចំនួន ​ក៏មិនបានគិតគូរពីបញ្ហាបរិស្ថានអនាម័យ​នៅ​កន្លែង​សាធារណៈ ជា​ពិសេស​ចំណុចចម្ការស្រល់ ​ដែលតែងមានភ្ញៀវទេសចរជួបជុំហូបអាហារនៅទីនោះ តែក្រោយ​ពេល​ពួក​គេចេញទៅវិញ ​មិនបានវេចខ្ចប់សំរាមទុកដាក់ឲ្យល្អនោះទេ ​ដូចនេះ​បានបន្សល់នូវសំរាមប្លាស្ទិក​ជាច្រើននៅបរិវេណចម្ការស្រល់ ហើយជារឿយៗ​មន្ត្រីបរិស្ថានបានដើរប្រមូលសំរាម​ទាំងនេះ​យក​ដុត​កម្ទេចចោល ៕អត្ថបទ៖ អ៊ិត ភីរុណ