ស្វាយរៀង៖ ខណៈពិធីបុណ្យចូលឆ្នាំថ្មីប្រពៃណីជាតិខ្មែរ នឹងឈានចូលមកដល់ នៅថ្ងៃស្អែកនេះ មន្ត្រីជំនាញ នៅតាមច្រកទ្វារព្រំដែនខេត្តស្វាយរៀង បានធ្វើការបង្កើនពង្រឹងអនុវត្តវិធានការសុខាភិបាល បន្ទាប់ពីពលរដ្ឋ ខ្មែរឆ្លងដែនចូលមកមានចំនួនកើនឡើងច្រើនជារៀងរាល់ថ្ងៃ ។

លោកវេជ្ជបណ្ឌិត អ៊ឹម បុត្រ ប្រធានក្រុមចត្តាឡីស័កប្រចាំច្រកទ្វារព្រំដែនអន្តរជាតិបាវិត បានប្រាប់ BTVកាលពីម្សិលមិញថា នៅប៉ុន្មានថ្ងៃចុងក្រោយនេះ ពលរដ្ឋខ្មែរ បានធ្វើដំណើរពីវៀតណាម ចូលមក កម្ពុជាតាមច្រកទ្វារព្រំដែនអន្តរជាតិបាវិត មានការកើនឡើងជាបន្តបន្ទាប់ បន្ទាប់ពីរាជ​រដ្ឋាភិបាល ​អនុញ្ញាតឲ្យមានការរៀបចំពិធីបុណ្យចូលឆ្នាំថ្មីប្រពៃណីជាតិឡើងវិញ ក្រោយពី​អាក់ខាន​ប្រារព្ធពិធីបុណ្យចូលឆ្នាំថ្មី​ ប្រពៃណីជាតិអស់រយៈពេលជាង២ឆ្នាំកន្លងមក។

លោក បានបញ្ជាក់ថា ការវិលត្រឡប់របស់ពលករខ្មែរចូលតាមច្រកទ្វារព្រំដែនអន្តរជាតិ ​មន្ត្រីគ្រប់​ផ្នែក ​បានខិតខំធ្វើការសម្រួលរាល់កិច្ចការងារផ្សេងៗជូន និងបានធ្វើការពិនិត្យសុខភាព​គ្រប់ៗគ្នា មុននឹង ​ឲ្យពួកគេវិលត្រលប់ទៅស្រុកកំណើត​តាមបណ្តារាជធានី-ខេត្តនានា។​ ការរឹតបន្តឹងវិធាន​ការ​នៅ​តាមច្រកព្រំដែន គឺដើម្បីទប់ស្កាត់ការនាំចូលជំងឺកូវីដ-១៩។

តាមរបាយការណ៍របស់មន្ត្រីក្រុមការងារចត្តាឡីស័កប្រចាំច្រកទ្វារព្រំដែនអន្តរជាតិបាវិត ​គិតត្រឹម ថ្ងៃទី១០ ​ខែមេសានេះ ​ច្រកទ្វារព្រំដែន ​មានភ្ញៀវជាជនជាតិខ្មែរ ​បានធ្វើដំណើរចូលមកកម្ពុជាវិញ ប្រមាណជាង ៨០០នាក់ ​ខណៈដែលភ្ញៀវបរទេសចូលមកកម្ពុជា​ មានកំណើន​ឡើងល្អបង្គួរ បន្ទាប់​ពី​រាជរដ្ឋាភិបាល​ បានធ្វើការបើកប្រទេសឡើងវិញ៕ អត្ថបទ៖ ភា សារិត