បាត់ដំបង៖ ស្របពេលដែលពិធីបុណ្យចូលឆ្នាំថ្មីប្រពៃណីជាតិខ្មែរកាន់តែខិតជិតមកដល់ ពលករខ្មែររាប់ពាន់នាក់ ក្នុងមួយថ្ងៃៗ បានសម្រុកចេញពីប្រទេសថៃ ចូលតាមច្រកខេត្តបាត់ដំបង ដើម្បីមកលេងស្រុកកំណើត ។

លោក ឃឹម ទិព្វមុនី ប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិដូង ស្រុកកំរៀង បានឱ្យ​ដឹងថា អាជ្ញាធរខេត្តច័ន្ទបុរី ប្រទេសថៃ បានសម្របសម្រួលឱ្យពលករខ្មែរវិលត្រឡប់មកលេង​ស្រុកកំណើត ក្នុងឱកាសបុណ្យចូលឆ្នាំខ្មែរ ​ចាប់ពីថ្ងៃទី៨ ដល់ថ្ងៃទី១៥ ខែមេសានេះ ទើបធ្វើឱ្យរំហូរ​ពលករ​មានការកើនឡើងខ្ពស់ពីមួយថ្ងៃទៅមួយថ្ងៃ។

ប្រធានច្រកព្រំដែនរូបនេះ បានបញ្ជាក់បន្ថែមថា ពលករខ្មែរវិលត្រឡប់មកពីប្រទេសថៃ ​ភាគច្រើន មានកាតចាក់វ៉ាក់សាំង​ ចាប់ពី២ដូសឡើងទៅ ​ហើយអាជ្ញាធរ បានខិតខំពន្លឿនការបំពេញ​បែប​បទផ្សេងៗ ដើម្បីឱ្យពួកគេបានត្រឡប់ទៅស្រុកកំណើតឆាប់រហ័ស។

លោក ឃឹម ទិព្វមុនី បានឱ្យដឹងបន្ថែមថា ចំពោះការចរាចរដោះដូរទំនិញ រវាងកម្ពុជា-ថៃ តាមច្រកខេត្តបាត់ដំបង នៅមុនបុណ្យចូលឆ្នាំថ្មីមានការកើនឡើង៕ អត្ថបទ៖ នឿត សុភក្ត្រ