ប្រធានាធិបតីអាមេរិក លោក Donald Trump និងរដ្ឋមន្ត្រីក្រសួងការពារជាតិ លោក Pete Hegseth កាលពីថ្ងៃអង្គារ (ទី១២ ខែឧសភា ឆ្នាំ២០២៦) បានព្រមានថា សហរដ្ឋអាមេរិកអាចបញ្ចប់បទឈប់បាញ់អាយុកាល ១ខែ ហើយចាប់ផ្ដើមការវាយប្រហាររបស់ខ្លួនលើអ៊ីរ៉ង់ឡើងវិញ ដោយការលើកឡើងនេះ កើតមានមួយថ្ងៃបន្ទាប់ពីលោក Trump បានបដិសេធការស្នើចុងក្រោយរបស់ទីក្រុងតេអេរ៉ង់ ដើម្បីបញ្ចប់សង្គ្រាម ដោយចាត់ទុកថា ជា «សំណើឥតមានប្រយោជន៍»។

នៅទីក្រុងវ៉ាស៊ីនតោន ខណៈពេលដែលលោកកំពុងរៀបចំធ្វើដំណើរទៅកាន់ទីក្រុងប៉េកាំង សម្រាប់ជំនួបកំពូលជាមួយមេដឹកនាំកំពូលរបស់ប្រទេសចិន គឺលោក ស៊ី ជីនពីង (Xi Jinping) លោក Trump បានប្រាប់អ្នកសារព័ត៌មានថា៖ «យើងនឹងធ្វើកិច្ចព្រមព្រៀង ឬបើមិនដូច្នោះទេ ពួកគេនឹងត្រូវបានបំផ្លាញយ៉ាងធ្ងន់ធ្ងរ។ មិនថា តាមមធ្យោបាយអ្វីនោះទេ យើងនឹងទទួលបានជោគជ័យ»។

ចំណែកលោក Hegseth បានប្រាប់សវនាការរបស់សភាថា៖ «យើងមានផែនការបង្កើនកម្រិតវាយប្រហារ ប្រសិនបើចាំបាច់។ យើងមានផែនការដកថយ ប្រសិនបើចាំបាច់។ យើងមានផែនការចល័តធនធានយោធារបស់យើង»។ យ៉ាងណាក្ដី លោកបានបដិសេធមិនផ្តល់ព័ត៌មានលម្អិត ដោយបញ្ជាក់ថា វាគឺជាការមិនសមរម្យឡើយ ក្នុងការនិយាយនៅក្នុងសវនាការដែលមិនមានភាពឯកជនបែបនេះ។

ការទាមទាររបស់អ៊ីរ៉ង់ ដើម្បីបញ្ចប់សង្គ្រាម រួមមានការសងសំណងសង្គ្រាមពីសហរដ្ឋអាមេរិក ការទទួលស្គាល់អធិបតេយ្យភាពរបស់អ៊ីរ៉ង់ លើច្រកសមុទ្រ Hormuz និងការបញ្ចប់ទណ្ឌកម្មដោយអាមេរិក។ នេះបើយោងតាមការចុះផ្សាយរបស់ប្រព័ន្ធផ្សព្វផ្សាយរដ្ឋកាលពីថ្ងៃទី១១ ខែឧសភា៕