ចក្រភពអង់គ្លេសបានឲ្យ​ដឹង​កាលពីថ្ងៃអង្គារ (ទី១២ ខែឧសភា ឆ្នាំ២០២៦) ថា ខ្លួននឹងរួមចំណែកផ្ដល់​ឧបករណ៍រាវ​រក​មីនស្វ័យប្រវត្តិ យន្តហោះចម្បាំង Typhoon និងនាវាចម្បាំង HMS Dragon នៅ​ក្នុងបេសកកម្មការពារពហុជាតិសាសន៍ដែលមានគោលបំណងធានាសុវត្ថិភាពដល់​ការដឹកជញ្ជូន នៅច្រកសមុទ្រ Hormuz។

រដ្ឋមន្ត្រីក្រសួងការពារជាតិ លោក​ John Healey បានប្រកាសពីការប្តេជ្ញាចិត្តនេះ ក្នុងអំឡុងពេលមាន​កិច្ចប្រជុំកំពូលនិម្មិត (អនឡាញ) ជាមួយសមភាគីជាង ៤០​រូប មកពីប្រទេសដទៃទៀតដែលពាក់ព័ន្ធនឹងបេសកកម្មនេះ ជា​អ្វី​​ដែល​លោកបាននិយាយថា នឹងចាប់ផ្តើមដំណើរការនៅពេលដែលលក្ខខណ្ឌអនុញ្ញាត​ឲ្យ​។

លោកបានបញ្ជាក់​​នៅក្នុងសេចក្តីថ្លែងការណ៍មួយថា៖ «ជាមួយសម្ព័ន្ធមិត្តរបស់យើង បេសកកម្មពហុជាតិសាសន៍នេះ នឹងមានលក្ខណៈការពារ ឯករាជ្យ និងគួរឲ្យ​ទុកចិត្ត"។

គួរបញ្ជាក់ថា សង្គ្រាមអ៊ីរ៉ង់បានធ្វើ​ឲ្យ​ចរាចរណ៍ថយចុះ​​យ៉ាងខ្លាំងភ្លាមៗ​ នៅ​ច្រកសមុទ្រ Hormuz ដោយរំខានដល់ការនាំចេញប្រេង និងធ្វើឲ្យ​តម្លៃថាមពលហក់​ឡើង។ ប្រហែល ១ភាគ៥ នៃប្រេងរបស់ពិភពលោកឆ្លងកាត់ច្រកសមុទ្រនេះ។

ការចូលរួមចំណែករបស់ចក្រភពអង់គ្លេស នឹងត្រូវបានគាំទ្រដោយមូលនិធិថ្មីចំនួន ១១៥លានផោន (១៥៥.៥៣លានដុល្លារ) សម្រាប់យានដ្រូន​រាវ​រក​មីន និងប្រព័ន្ធប្រឆាំងយាន​ដ្រូន​ ខណៈដែលទីក្រុងឡុងដ៍្រស្វែងរកការធានាដល់ការដឹកជញ្ជូនពាណិជ្ជកម្ម ដោយសារការប្តេជ្ញាចិត្តរបស់ខ្លួន ចំពោះសេរីភាពនៃការធ្វើនាវាចរណ៍ ក្នុង​អំឡុង​ពេលមានការ​កើន​ឡើង​នូវ​ភាពតានតឹងក្នុងតំបន់៕