មេដឹកនាំក្រុមហេសបូឡា លោក Naim Qassem បាននិយាយកាលពីថ្ងៃអង្គារថា ក្រុមនេះ នឹងបន្តប្រយុទ្ធ ដោយមិនគិតពីរយៈពេល ឬការលះបង់ដ៏ធំធេងប៉ុនណានោះទេ» ដោយសង្កត់ធ្ងន់ថា ក្រុមហេសបូឡានឹងមិនវិលត្រឡប់ទៅដំណាក់កាល មុនថ្ងៃទី ០២ ខែមីនាវិញទេ»។

លោក Qassem បាននិយាយនៅក្នុងសុន្ទរកថាតាមទូរទស្សន៍ទៅកាន់សមាជិករបស់ក្រុមហេសបូឡាថា ៖ «យើងនឹងមិនចាកចេញពីសមរភូមិទេ ហើយនឹងប្រែក្លាយវាទៅជាសុបិនអាក្រក់សម្រាប់អ៊ីស្រាអែល»។

លោកក៏បានអំពាវនាវឲ្យមានការចរចាដោយប្រយោលជាមួយអ៊ីស្រាអែលផងដែរ ព្រោះការចរចាដោយផ្ទាល់នឹងស្មើនឹង«ការផ្តល់ផលប្រយោជន៍សុទ្ធសាធសម្រាប់អ៊ីស្រាអែល និងសម្បទានគ្មានលក្ខខណ្ឌពីរដ្ឋលីបង់»។

លោក Qassem បានបន្ថែមថា ការចរចាបែបនេះ គួរតែផ្តល់អាទិភាពដល់ការបញ្ឈប់ការវាយប្រហាររបស់អ៊ីស្រាអែល ការធានាការដកទ័ពរបស់អ៊ីស្រាអែលចេញពីទឹកដីលីបង់ ការដាក់ពង្រាយកងទ័ពលីបង់នៅភាគខាងត្បូងនៃទន្លេ Litani ការដោះលែងអ្នកទោស ការសម្របសម្រួលការវិលត្រឡប់របស់ប្រជាជនដែលផ្លាស់ទីលំនៅ និងការចាប់ផ្តើមកិច្ចខិតខំប្រឹងប្រែងកសាងឡើងវិញ។

លោកបានលើកឡើងថា កិច្ចព្រមព្រៀងណាមួយដែលអាចកើតមានរវាងអ៊ីរ៉ង់ និងសហរដ្ឋអាមេរិក ដែលរួមមានការបញ្ចប់ការវាយប្រហារលើប្រទេសលីបង់ អាចក្លាយជាឱកាសដ៏រឹងមាំមួយ ដើម្បីបញ្ឈប់សង្គ្រាមនេះ៕