កាលពីថ្ងៃអង្គារ (ទី១២ ខែឧសភា ឆ្នាំ២០២៦) ក្រសួងការបរទេសបានប្រាប់សារព័ត៌មាន Reuters ថា មន្ត្រីជាន់ខ្ពស់អាមេរិក និងចិន យល់ស្របថា គ្មានប្រទេសណាមួយអាចត្រូវបានអនុញ្ញាតឲ្យយកថ្ងៃសេវា លើការដឹកជញ្ជូនទំនិញ នៅច្រកសមុទ្រ Hormuz នោះឡើយ ជាសញ្ញាមួយដែលបង្ហាញថា ប្រទេសទាំង២ កំពុងព្យាយាមស្វែងរកចំណុចរួម ជុំវិញកិច្ចប្រឹងប្រែង ដើម្បីដាក់សម្ពាធលើអ៊ីរ៉ង់ឲ្យបោះបង់ការគ្រប់គ្រងលើផ្លូវទឹកដ៏សំខាន់នេះ។

សេចក្តីថ្លែងការណ៍របស់ក្រសួងការបរទេសនេះ ធ្វើឡើងមុនជំនួបកំពូលដ៏សំខាន់ រវាងប្រធានាធិបតី លោក Donald Trump និងប្រធានាធិបតីចិន លោក ស៊ី ជីនពីង (Xi Jinping) នាចុងសប្តាហ៍នេះ ដែលការគ្រប់គ្រងយ៉ាងតឹងរ៉ឹងរបស់អ៊ីរ៉ង់ លើច្រកសមុទ្រនេះ នឹងស្ថិតនៅក្នុងរបៀបវារៈ។

ការបិទស្ទើរតែទាំងស្រុងរបស់អ៊ីរ៉ង់ ចំពោះផ្លូវពាណិជ្ជកម្មដ៏សំខាន់នេះ ចាប់តាំងពីមានការវាយប្រហារតាមអាកាសរួមគ្នា រវាងអ៊ីស្រាអែល និងសហរដ្ឋអាមេរិក លើប្រទេសនេះកាលពីថ្ងៃទី២៨ ខែកុម្ភៈ បានបង្កឲ្យជាផលប៉ះពាល់យ៉ាងខ្លាំងដល់ទីផ្សារថាមពលពិភពលោក។

ក្រសួងការបរទេសបានឲ្យដឹងថា រដ្ឋមន្ត្រីការបរទេសចិន លោក Wang Yi និងរដ្ឋមន្ត្រីការបរទេសអាមេរិក លោក Marco Rubio បានពិភាក្សាអំពីបញ្ហានេះ អំឡុងពេលរសន្ទនាតាមទូរស័ព្ទ កាលពីខែមេសា។ ដើម្បីឆ្លើយតបទៅនឹងសំណួរ ពាក់ព័ន្ធនឹងការជជែករតាមទូរស័ព្ទនេះ អ្នកនាំពាក្យក្រសួង លោក Tommy Pigott បានប្រាប់សារព័ត៌មាន Reuters ថា៖ «ពួកលោកបានឯកភាពគ្នាថា គ្មានប្រទេស ឬអង្គការណាមួយអាចត្រូវបានអនុញ្ញាតឲ្យគិតថ្លៃសេវាឆ្លងកាត់ផ្លូវទឹកអន្តរជាតិ ដូចជាច្រកសមុទ្រហ័រមូសនេះនោះទេ» ។

ស្ថានទូតចិនមិនបានជំទាស់នោះទេ ចំពោះការប្រាប់ឲ្យដឹងរបស់សហរដ្ឋអាមេរិក ជុំវិញការពិភាក្សានេះ ដោយបញ្ជាក់ថា ខ្លួនសង្ឃឹមថា គ្រប់ភាគីទាំងអស់អាចធ្វើការរួមគ្នា ដើម្បីធ្វើឲ្យចរាចរណ៍មានធម្មតាឡើងវិញ តាមរយៈច្រកសមុទ្រនេះ៕