លោក Elon Musk នាយកប្រតិបត្តិក្រុមហ៊ុន Tesla គឺជាម្នាក់ ក្នុងចំណោមនាយកប្រតិបត្តិអាជីវកម្មជាច្រើននាក់ ដែលធ្វើដំណើរទៅកាន់ប្រទេសចិនជាមួយលោកប្រធានាធិបតី Donald Trump តាមយន្តហោះ Air Force One ខណៈដែលមេដឹកនាំអាមេរិករូបនេះ ទៅកាន់ទីក្រុងប៉េកាំង សម្រាប់ជំនួបកំពូលជាមួយសមភាគីចិនរបស់លោក គឺលោក ស៊ី ជីនពីង (Xi Jinping)។

បើយោងតាមរបាយការណ៍របស់សេតវិមាន បានឲ្យដឹងថា ពិធីករទូរទស្សន៍ Fox News លោក Sean Hannity ក៏មានវត្តមាននៅលើយន្តហោះនេះផងដែរ ខណៈដែលនាយកប្រតិបត្តិក្រុមហ៊ុន Nvidia លោក Jensen Huang ដែលមិនមានឈ្មោះក្នុងបញ្ជីភ្ញៀវដំបូង បានឡើងយន្តហោះនៅនាទីចុងក្រោយ ក្នុងអំឡុងពេលឈប់ចាក់ប្រេងនៅទីក្រុង Anchorage រដ្ឋ Alaska។ តាមរយៈការបង្ហោះលើបណ្ដាញសង្គម Truth Social លោក Trump ក៏បានបញ្ជាក់ផងដែរថា លោក Huang កំពុងនៅលើយន្តហោះ Air Force One។

ប្រធានាធិបតីអាមេរិករូបនេះ ក៏បានបង្ហាញឈ្មោះនាយកប្រតិបត្តិមួយចំនួនទៀត ដែលចូលរួមជាមួយលោកក្នុងដំណើរទស្សនកិច្ចផ្លូវការនេះផងដែរ រួមមានលោក Tim Cook របស់ក្រុមហ៊ុន Apple លោក Larry Fink របស់ក្រុមហ៊ុន BlackRock លោក Stephen Schwarzman របស់ក្រុមហ៊ុន Blackstone លោក Kelly Ortberg របស់ក្រុមហ៊ុន Boeing លោក Brian Sikes របស់ក្រុមហ៊ុន Cargill លោកស្រី Jane Fraser របស់ក្រុមហ៊ុន Citigroup លោក Larry Culp របស់ក្រុមហ៊ុន GE Aerospace លោក David Solomon របស់ក្រុមហ៊ុន Goldman Sachs លោក Sanjay Mehrotra របស់ក្រុមហ៊ុន Micron និងលោក Cristiano Amon របស់ក្រុមហ៊ុន Qualcomm។

គួរបញ្ជាក់ថា ទស្សនកិច្ច ចាប់ពីថ្ងៃទី១៣ ដល់ថ្ងៃទី១៥ ខែឧសភា គឺជាដំណើរទស្សនកិច្ចលើកដំបូងរបស់ប្រធានាធិបតីអាមេរិកទៅកាន់ប្រទេសចិន គិតចាប់តាំងពីឆ្នាំ២០១៧ ហើយដើមឡើយត្រូវបានគ្រោងទុក នៅខែមេសា មុនពេលត្រូវបានពន្យារពេលដោយសារតែសង្គ្រាមអាមេរិក-អ៊ីស្រាអែល លើអ៊ីរ៉ង់៕