ត្បូងឃ្មុំ​៖​ខណៈថ្ងៃនេះ ជាថ្ងៃទី១នៃពិធីបុណ្យចូលឆ្នាំប្រពៃណីជាតិខ្មែរ ក្រុមយុវជនស្រុកត្បូងឃ្មុំ បានរៀបចំអបអរសង្ក្រានឆ្នាំថ្មី ដើម្បីបង្ហាញស្មារតីអរគុណសន្តិភាព។

ក្នុងឱកាសប្រជាពលរដ្ឋនៅទូទាំងប្រទេសចាប់ផ្តើមអបអរពិធីបុណ្យចូលឆ្នាំប្រពៃណីជាតិខ្មែរ លោក គន់ រ័ត្នមុនី អនុប្រធានក្រុមការងារយុវជនគណបក្សខេត្តត្បូងឃ្មុំ បានដឹកនាំក្រុមយុវជនរៀបចំអបអរសង្ក្រាន្តឆ្នាំថ្មី និងកម្មវិធីប្រលងចម្រៀងដែលមានឈ្មោះថា«យុវជនឃុំយើង» នៅវត្តដំណាក់ចារ ភូមិដំណាក់ចារ ស្ថិតក្នុងឃុំអញ្ចើម ស្រុកត្បូងឃ្មុំ។ ក្នុងពិធីអបអរសង្ក្រានឆ្នាំថ្មីនេះ ក្រុមយុវជនបានបង្ហាញពាក្យស្លោកក្នុងកម្មវិធីរបស់ខ្លួនថា «បេះដូងយុវជន អរគុណសន្តិភាព»។

លោក គន់ រ័ត្នមុនី បានឲ្យដឹងថា សង្រ្កាន្ត «យុវជនឃុំយើង» បានរៀបចំកាន់បង្ហាញអំពីផលិតរបស់កូនខ្មែរបានយ៉ាងស្រស់ស្អាត ក៏ដូចជាការតុបតែងជាច្រើនទៀត ដើម្បីត្រៀមផ្ដល់ភាពសប្បាយរីករាយជូនប្រជាពលរដ្ឋនៅថ្ងៃចូលឆ្នាំ។

លោក គន់ រ័ត្នមុនី បញ្ជាក់ថា ការប្រើប្រាស់ពាក្យស្លោកក្នុងកម្មវិធី «បេះដូងយុវជន អរគុណសន្តិភាព» គឺសំដៅបង្ហាញស្មារតីរបស់ក្រុមយុវជនប្តេជ្ញាការពារសុខសន្តិភាពឲ្យបានគង់វង្សយូរអង្វែង ដើម្បីបន្តទទួលបានការអភិវឌ្ឍ និងរីកចម្រើនបន្ថែមទៀត។

ឦោក គន់ រ័ត្នមុនី បន្តថា ក្រុមយុវជនបានរៀបចំកម្មវិធីសង្រ្កាន្ត ដោយភ្ជាប់ជាមួយនឹងល្បែងប្រជាប្រិយគ្រប់ប្រភេទ និងការរាំកម្សាន្ត ខណៈលោក ក៏បានអំពាវនាវដល់ប្រជាពលរដ្ឋក្នុងមូលដ្ឋានអញ្ជើញមកកំសាន្ត ក្នុងឱកាសចូលឆ្នាំខ្មែរ។

ការរៀបចំប្រារព្ធពិធីចូលឆ្នាំប្រពៃណីជាតិខ្មែរឆ្នាំ២០២២នេះ ជាការរៀបចំលើកដំបូងរបស់កម្ពុជា ក្រោយមានវត្តមានវត្តមានកូវីដ។ តាមរាជធានី-ខេត្ត ជាច្រើនក៏បានរៀបចំកម្មវិធីសង្រ្កាន្ត និង តុបតែង យ៉ាងស្រស់ស្អាត ដើម្បីផ្ដល់ភាពសប្បាយជូនប្រជាពលរដ្ឋ។ ការរៀបចំកម្មវិធីចូលឆ្នាំប្រពៃណីជាតិខ្មែរនេះ ក៏ស្របពេលដែលកម្ពុជា មានករណីឆ្លងកូវីដធ្លាក់ចុះមកត្រឹម២ខ្ទង់ជាប្រចាំថ្ងៃ និងស្របពេលដែល កម្ពុជាសម្រេចជោគជ័យធំធេងលើការចាក់វ៉ាក់សាំងជូនប្រជាពលរដ្ឋ៕