ប្រមុខ​​អង្គការសុខភាពពិភពលោកបានប្រាប់ប្រទេសនានាឱ្យត្រៀមខ្លួនទប់ទល់​​ករណីឆ្លងវីរុស​ hanta បន្ថែមទៀត ខណៈក្រុម​​អាជ្ញាធរនៅទីក្រុងប៉ារីសបាននិយាយថា ស្ត្រីជនជាតិបារាំងម្នាក់ដែលបានឆ្លងវីរុស​នៅលើនាវាទេសចរណ៍​​ MV Hondius មានទម្រង់ធ្ងន់ធ្ងរបំផុតនៃជំងឺនេះ ហើយត្រូវបានដាក់ឱ្យប្រើម៉ាស៊ីនជំនួយដង្ហើម។​

លោក Tedros Adhanom Ghebreyesus បានថ្លែងអំណរគុណដល់ប្រទេសអេស្ប៉ាញចំពោះ "ការអាណិតអាសូរ និងសាមគ្គីភាព" ដែលខ្លួនបានបង្ហាញ ​ដោយការទទួលយកនាវាទេសចរណ៍​រងគ្រោះ និងបានជំរុញឱ្យអាជ្ញាធរអនុវត្តតាមដំបូន្មាន និងអនុសាសន៍របស់អង្គការសុខភាពពិភពលោក ដែលរួមមានការដាក់ឱ្យនៅដាច់ដោយឡែករយៈពេល ៤២ ថ្ងៃ និងការត្រួតពិនិត្យជាប្រចាំលើអ្នកប៉ះពាល់ដែលមានហានិភ័យខ្ពស់។​​​

លោកបានប្រាប់សន្និសីទសារព័ត៌មានមួយនៅទីក្រុងម៉ាឌ្រីដកាលពីថ្ងៃអង្គារ​ថា នៅពេលនេះ មិនមានសញ្ញាណាមួយបង្ហាញថាពួកលោក​ កំពុងមើល​ឃើញការចាប់ផ្តើមនៃការផ្ទុះឡើងកាន់តែធំនោះទេ ប៉ុន្តែជាការពិតណាស់ ស្ថានភាពអាចផ្លាស់ប្តូរ ហើយដោយសាររយៈពេលកកើត​​យូរនៃវីរុស​ វាអាចទៅរួចដែលពួកលោក​​អាចមើលឃើញករណីជាច្រើនទៀតនៅក្នុងសប្តាហ៍ខាងមុខនេះ។

នាវាកម្សាន្ត​​​​ MV Hondius ដែលធ្វើដំណើរពីប្រទេសអាហ្សង់ទីនទៅកាន់ប្រទេស កាបវែរ (Cape Verde)​​​នៅ​​តំបន់​អាហ្វ្រិកខាងលិច​​ បានរកឃើញថាខ្លួនស្ថិតនៅចំកណ្តាលនៃការផ្ទុះឡើងនៃ​​វីរុស​​នេះ ​ បន្ទាប់ពីអ្នកដំណើរបីនាក់ ប្តីប្រពន្ធជនជាតិហូឡង់ និងជនជាតិអាល្លឺម៉ង់ម្នាក់ បានស្លាប់ដោយសារវីរុស​​​នេះ​ ។​​​ទោះបីជាជាធម្មតា ឆ្លង​​រាលដាលតាមរយៈ​​​សត្វកកេរព្រៃ ឬ​​សត្វ​កណ្ដុរក៏ដោយ វីរុស hanta ​ អាចចម្លងពីមនុស្សម្នាក់ទៅមនុស្សម្នាក់ក្នុងករណីកម្រនៃការប៉ះពាល់ជិតស្និទ្ធ៕