មេដឹកនាំកោះតៃវ៉ាន់ លោក Lai Ching-te កាលពីថ្ងៃអង្គារ (ទី១២ ខែឧសភា ឆ្នាំ២០២៦) បានថ្លែងអំណរគុណដល់សហរដ្ឋអាមេរិក ដែលបានជួយពង្រឹងវិស័យការពាររបស់កោះនេះ ហើយបាននិយាយថា ទីក្រុងតៃប៉ិនឹងមិនចុះញ៉មជាមួយការដាក់សម្ពាធនោះទេ មុនពេលមានជំនួបកំពូល រវាងមេដឹកនាំសហរដ្ឋអាមេរិក និងចិន នៅទីក្រុងប៉េកាំង នាសប្តាហ៍នេះ។

ប្រធានាធិបតីសហរដ្ឋអាមេរិក លោក Donald Trump និងប្រធានាធិបតីចិន លោក ស៊ី ជីនពីង (Xi Jinping) កំពុងរៀបចំកិច្ចប្រជុំរយៈពេល ២ថ្ងៃ នៅថ្ងៃព្រហស្បតិ៍ និងថ្ងៃសុក្រ ដោយបញ្ហាកោះតៃវ៉ាន់ ដែលទីក្រុងប៉េកាំងចាត់ទុកថា ជាទឹកដីរបស់ខ្លួន ប្រាកដជានឹងត្រូវបានលើកយកមកពិភាក្សា។

សហរដ្ឋអាមេរិកគឺជាអ្នកគាំទ្រអន្តរជាតិដ៏សំខាន់បំផុតរបស់កោះតៃវ៉ាន់ ទោះបីជាមិនមានចំណងការទូតជាផ្លូវការក៏ដោយ និងជាអ្នកលក់អាវុធសំខាន់ សម្រាប់ដែនកោះនេះ។ ប្រទេសចិនតែងតែបង្ហាញការខឹងសម្បាឥតឈប់ឈរ និងបានទាមទារឲ្យបញ្ឈប់ដំណើរការលក់អាវុធ។

ដោយបាននិយាយជាភាសាអង់គ្លេស នៅក្នុងសារវីដេអូមួយទៅកាន់កិច្ចប្រជុំកំពូលប្រទេសប្រជាធិបតេយ្យនៅទីក្រុង Copenhagen ប្រទេសដាណឺម៉ាក ដោយមិនបានសំដៅដោយផ្ទាល់ អំពីកិច្ចប្រជុំ រវាងលោក Trump និងលោក ស៊ី លោក Lai បានលើកឡើងថា៖ «ខ្ញុំសូមថ្លែងអំណរគុណដល់សហរដ្ឋអាមេរិក ដែលបានជួយយើងពង្រឹងសមត្ថភាពការពាររបស់យើង ដែលជាផ្នែកមួយនៃការប្តេជ្ញាចិត្តដ៏រឹងមាំរបស់ខ្លួនចំពោះសន្តិសុខ»។

ជាមួយគ្នានេះ ដោយប្រើប្រាស់ពាក្យពេចន៍ដែលប្រាកដណាស់ធ្វើឲ្យប្រទេសចិនមានកំហឹង លោក Lai បាននិយាយថា៖ «អ្នកកោះតៃវ៉ាន់មិនខ្លបខ្លាចឡើយ នៅចំពោះមុខការកើនឡើងនូវបញ្ហាប្រឈមពីខាងក្រៅ ហើយពួកគេនឹងមិនចុះចាញ់ជាមួយការដាក់សម្ពាធឡើយ។ កោះតៃវ៉ាន់ គឺជាដែនដីឯករាជ្យ និងអធិបតេយ្យ»។

ក្រសួងការបរទេសចិនមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។ ប្រទេសចិនមិនពេញចិត្តលោក Lai ឡើយ ហើយចាត់ទុករូបលោកថា ជា «ជនបំបែកខ្លួន«។ ទីក្រុងប៉េកាំងបានបដិសេធម្តងហើយម្តងទៀត ចំពោះការស្នើចរចាពីរូបលោក៕