បាត់ដំបង៖ នៅក្នុងខេត្តបាត់ដំបង មានតំបន់ទេសចរណ៍វប្បធម៌ និងធម្មជាតិជាច្រើនកន្លែង ដែលគួរជាទីកន្លែងសម្រាកលំហែកម្សាន្តអារម្មណ៍ ក្នុងឱកាសឈប់សម្រាកអបអរសាទរ​ពិធីបុណ្យចូលឆ្នាំថ្មី​ ប្រពៃណីជាតិខ្មែរ។ ជាពិសេស​កម្មវិធី​សង្រ្កាន្ត​បាត់ដំបង និង​តំបន់​ទេសចរណ៍ទាំងនោះបា​នត្រៀមខ្លួនរួចជាស្រេចសម្រាប់ទទួលស្វាគមន៍ភ្ញៀវទេសចរ។

មន្ត្រីទេសចរណ៍រំពឹងថា បន្ទាប់ពីអាក់ខានពីរឆ្នាំនៃការប្រារព្ធពិធីបុណ្យចូលឆ្នាំថ្មី ទេសចរ នឹង​រីករាយក្នុង ការធ្វើដំណើរកម្សាន្ត ហើយខេត្តបាត់ដំបង នឹង​ជា​គោលដៅ​មួយនៃ​ទេសចរផងដែរ។ ទីតាំងទេសចរណ៍ជាច្រើន ក្នុងខេត្តបាត់ដំបង ពិសេសរមណីយដ្ឋានទេសចរណ៍បែបធម្មជាតិ ត្រូវ បាន​តុបតែងលម្អ ត្រៀមបម្រុងសេវាកម្មនានា ដើម្បីទទួលស្វាគមន៍ និងបម្រើដល់ភ្ញៀវទេសចរ ។

លោក ហម អរុណ ប្រធានការិយាល័យគ្រប់គ្រងឧស្សាហកម្មទេសចរណ៍ នៃមន្ទីរ​ទេសចរណ៍​ខេត្តបាត់ដំបង បានថ្លែងឱ្យដឹងថា ទន្ទឹមនឹងការរៀបចំកម្មវិធីកម្សាន្តសប្បាយ ក្រុម​ការងារ​មន្ទីរ​ទេសចរណ៍ត្រៀមចុះពង្រឹងការអនុវត្តន៍វិធានការសុខាភិបាលនៅតាមតំបន់រមណីយដ្ឋាននានា ដើម្បី​ទប់ស្កាត់ការចម្លងជំងឺកូវីដ១៩។

ខេត្តបាត់ដំបងមានវិសាលភាពរមណីយដ្ឋាន និងគោលដៅ​ទេសចរណ៍​ទូទាំង​ខេត្ត​មាន​ចំនួន​១១១ ទីតាំងក្នុងនោះ រមណីយដ្ឋានទេសចរណ៍មានចំនួន ២០ ទីតាំង សហគមន៍ និង​អេកូ​ទេសចរណ៍មាន ០៤ ទីតាំង គោលដៅទេសចរណ៍មាន ៥៤ ទីតាំង ទេសចរណ៍សាសនាមាន ២៩ ទីតាំង និងកសិទេសចរណ៍មាន០៤ទីតាំង៕