ប្រធានាធិបតីអ៊ុយក្រែន លោក Volodymyr Zelensky បានព្រមានអំពីលទ្ធភាព​មាន​ការវាយប្រហារជាបន្ត​បន្ទាប់​ដោយ​យានដ្រូន​របស់រុស្ស៊ី ពេញមួយថ្ងៃពុធ (ទី១៣ ខែឧសភា ឆ្នាំ២០២៦) នេះ​ ដោយនិយាយថា យានដ្រូន​ជាង ១០០គ្រឿង ស្ថិតនៅក្នុងដែនអាកាសរបស់អ៊ុយក្រែន ខណៈដែលទីក្រុងមូស្គូបានប្តូរយុទ្ធសាស្ត្រ ដើម្បីបើក​ការ​វាយប្រហារកាន់តែខ្លាំង ក្នុងអំឡុង​ពេលថ្ងៃ។

លោក Zelensky បានឲ្យ​ដឹង​តាម​រយៈ​សារមួយនៅលើបណ្ដាញ​សង្គម X ថា៖ «រុស្ស៊ីបន្តការវាយប្រហាររបស់ខ្លួន ហើយកំពុងធ្វើដូច្នេះដោយឥតញញើត​ ដោយមាន​ចេតនា​កំណត់គោលដៅលើ​ហេដ្ឋារចនាសម្ព័ន្ធផ្លូវដែក និងទីតាំងស៊ីវិលរបស់យើង នៅក្នុងទីក្រុងនានា​របស់យើង។

ចាប់តាំងពីការ​ចាប់​ផ្ដើម​​​នៃសង្គ្រាម កាល​ពី​ជាង ៤ឆ្នាំមុន រុស្ស៊ីភាគច្រើនបានធ្វើការវាយប្រហារធំៗ ដោយយានដ្រូន​ និងមីស៊ីល នៅ​ពេលយប់។ តែ​ក្នុងសប្តាហ៍ថ្មីៗនេះ ប្រទេស​នេះ​បានបញ្ជូនយាន​ដ្រូន​ និងមីស៊ីលរាប់រយគ្រឿងម្តងហើយម្តងទៀត ក្នុង​អំឡុង​ពេលថ្ងៃ។

មាន​ការ​កត់​ត្រាកម្រិត​ខ្ពស់​បំផុត​ សម្រាប់ចំនួនអាវុធដែលត្រូវបាន​ប្រើប្រាស់​ក្នុងការវាយប្រហារបែបនេះ កាលពី​ថ្ងៃទី២៤ ខែមីនា។ ការវាយប្រហារក្នុងពេលថ្ងៃ គឺរំខានដល់ជីវិតជនស៊ីវិលកាន់តែច្រើន។

កងទ័ពអាកាសអ៊ុយក្រែន បានរាយការណ៍ថា រុស្ស៊ីបានវាយប្រហារប្រទេសដោយប្រើយានដ្រូន​ចំនួន ១៣៩គ្រឿង ចាប់តាំងពីម៉ោង ៦ល្ងាច (ត្រូវ​នឹង​ម៉ោង ១៥ ម៉ោង​សកល​) កាល​ពី​ថ្ងៃអង្គារ ដែលក្នុងនោះ ១១១គ្រឿង ត្រូវបានបាញ់ទម្លាក់ ឬធ្វើ​ឲ្យ​លែង​ដំណើរការ​។

ទីក្រុងមូស្គូបដិសេធថា មិនបានកំណត់គោលដៅជនស៊ីវិលដោយចេតនានោះ​ទេ ប៉ុន្តែបានសម្លាប់ពួកគេរាប់ពាន់នាក់ក្នុងអំឡុងសង្គ្រាម ហើយបញ្ជាក់​ថា ការវាយប្រហារលើហេដ្ឋារចនាសម្ព័ន្ធស៊ីវិល គឺស្របច្បាប់ ប្រសិនបើ​ធ្វើឲ្យ​សមត្ថភាពប្រយុទ្ធរបស់អ៊ុយក្រែនចុះខ្សោយ៕