រដ្ឋមន្ត្រីការបរទេសរុស្ស៊ី លោក Sergey Lavrov បានចោទប្រកាន់សហរដ្ឋអាមេរិកថា បាន​ព្យាយាមបង្វែរការចាប់អារម្មណ៍របស់​ពិភពលោកចេញពីបញ្ហាប៉ាឡេស្ទីន។

ក្នុងបទសម្ភាសន៍ជាមួយទូរទស្សន៍ RT India លោក Lavrov បានអត្ថាធិប្បាយ ជុំវិញ​ស្ថានភាព នៅតំបន់​មជ្ឈិមបូព៌ាថា ជម្លោះដែលបង្កឡើងដោយសហរដ្ឋអាមេរិក ពាក់ព័ន្ធនឹងប្រទេស​អ៊ីរ៉ង់ វ៉េណេស៊ុយអេឡា គុយបា កាណាដា និង​កោះ Greenland កំពុងបង្វែរការចាប់អារម្មណ៍របស់​អន្តរជាតិចេញ​ពីជម្លោះអ៊ីស្រាអែល-ប៉ាឡេស្ទីន។

លោកបានបញ្ជាក់​ថា៖ «កិច្ចប្រឹងប្រែងទាំងអស់ដែលកំពុងត្រូវបានធ្វើឡើង នា​ពេលនេះ នៅ​ប្រទេសវ៉េណេស៊ុយអេឡា អ៊ីរ៉ង់ គុយបា កោះ Greenland ហើយ​ឥឡូវនេះកាណាដា បញ្ហាទាំងអស់នេះកំពុងធ្វើឲ្យ​យើងទៅឆ្ងាយពីការដោះស្រាយវិបត្តិ​អូសបន្លាយ និងអាក្រក់​បំផុត នៅក្នុងពិភពលោក នោះគឺវិបត្តិ ជុំវិញប៉ាឡេស្ទីន​»។

លោក​រដ្ឋមន្ត្រីរូបនេះ បានរិះគន់សំណើរបស់អាមេរិក ទាក់ទងនឹងអនាគតនៃតំបន់ហ្កាហ្សា ដោយនិយាយថា ពួកគេមិនបានលើកឡើងពីការបង្កើតរដ្ឋប៉ាឡេស្ទីននោះទេ​។

លោក Lavrov បានសង្កត់ធ្ងន់​ថា៖ «ខ្ញុំមិនមានការសង្ស័យនោះទេថា នៅពេលដែលផែនការញុះញង់ឲ្យមាន​ការឈ្លានពាន លើ​អ៊ីរ៉ង់ កំពុងត្រូវបានបង្កើតឡើង គោលដៅមួយ គឺដើម្បីរារាំង​ការធ្វើឲ្យមាន​ប្រក្រតីភាព​នៃ​​ទំនាក់ទំនង រវាងអ៊ីរ៉ង់ និងរដ្ឋអារ៉ាប់»។

លោកបានបន្ថែមថា៖ «ឥឡូវនេះ អ្វីៗគ្រប់យ៉ាងកំពុងត្រូវបានធ្វើ ដើម្បីធានាថា ការផ្សះផ្សាមិន​មាន​ថ្ងៃកើតឡើង​ឡើយ​ និងដើម្បីទាញប្រទេសជិតខាងឈូងសមុទ្រដទៃទៀតឲ្យ​ចូលទៅក្នុងរចនាសម្ព័ន្ធ ដែលទី១ នឹងមិនផ្តោតលើការដោះស្រាយបញ្ហាប៉ាឡេស្ទីន និងទី២ នឹងបង្ខំឲ្យ​ពួកគេ​ក្បត់នឹង​បុព្វហេតុប៉ាឡេស្ទីន ជា​ថ្នូរនឹង​ការ​​​ធ្វើឲ្យ​មាន​ប្រក្រតីភាព​នៃ​ទំនាក់ទំនងជាមួយអ៊ីស្រាអែល»៕