សាក្សីរបស់ទីភ្នាក់​ងារ​សារព័ត៌មាន​ Reuters បានឮសំឡេងកាំភ្លើងជាច្រើនគ្រាប់ នៅឯ​ព្រឹទ្ធសភាហ្វីលីពីននៅថ្ងៃពុធ (ទី១៣ ខែឧសភា ឆ្នាំ២០២៦) នេះ​ ហើយមនុស្សម្នា​ត្រូវបានប្រាប់ឲ្យ​រត់រក​កន្លែង​លាក់​ខ្លួន ខណៈដែលភាពច្របូក​ច្របល់​បានកើន​​ឡើងកាន់​តែខ្លាំង​ អំឡុង​ពេល​មាន​ការរំពឹងទុកពី​ការប៉ុនប៉ងចាប់ខ្លួនសមាជិកព្រឹទ្ធសភាជាន់ខ្ពស់​ម្នាក់ដែលតុលាការព្រហ្មទណ្ឌអន្តរជាតិ (ICC) ត្រូវការ​ខ្លួន​។

គេមិនច្បាស់នោះទេ​ថា តើ​មានអ្វីកើតឡើង ឬអ្នកណាជាអ្នកបាញ់នោះទេ។ អ្នកសារព័ត៌មាន​របស់ទីភ្នាក់ងារ​សារព័ត៌មាន Reuters បានឃើញបុគ្គលិកយោធាជាង ១០នាក់ បានទៅ​ដល់អគារព្រឹទ្ធសភាមុនហេតុការណ៍នោះ​ ដោយខ្លះមាន​កាំភ្លើងវែង​ប្រភេទ​វាយប្រហារ។

ភា្លមៗនេះ គេមិនច្បាស់ថា ហេតុអ្វីបានជាកងទ័ពមាន​វត្តមាន​នៅទីនោះ ហើយមន្ត្រីយោធាមិនអាចទាក់ទងសុំការអត្ថាធិប្បាយភ្លាមៗបានឡើយ​។ ជាមួយ​គ្នានេះ គេមិនដឹង​ច្បាស់នោះទេ​ថា តើបុគ្គលិកសន្តិសុខផ្សេងទៀត មាន​នៅខាងក្នុងអគារដែរ ឬអត់។

ហេតុការណ៍​នេះបានកើតឡើងនៅពេលដែលលោក Ronald dela Rosa ដែលជាអ្នកទទួល​ខុសត្រូវ​ដ៏​សំខាន់ អំឡុង​ពេលមាន​ «សង្គ្រាមប្រឆាំងគ្រឿងញៀន» របស់អតីតប្រធានាធិបតីហ្វីលីពីន លោក​ Rodrigo Duterte បានឲ្យ​ដឹង​នៅលើបណ្ដាញ​សង្គម Facebook ថា ការចាប់ខ្លួនលោកជិតកើតឡើង​​ហើយ ហើយបានជំរុញឲ្យ​មនុស្សប្រមូលផ្តុំគ្នា ដើម្បីការពារកុំ​ឲ្យមាន​ការប្រគល់រូប​លោក​​ទៅឲ្យ​ ICC។

លោក Dela Rosa ដែលបានទៅ​នៅក្នុងការិយាល័យនីតិបញ្ញត្តិរបស់លោក ចាប់តាំងពីថ្ងៃទី១១ ខែឧសភា បានអំពាវនាវឲ្យ​សាធារណជនចេញមករារាំងការចាប់ខ្លួនលោក ដោយនិយាយថា ភ្នាក់ងារអនុវត្តច្បាប់កំពុងដំណើរការបន្ទាប់ពីការចេញដីកាចាប់ខ្លួនរបស់ ICC៕