អាជ្ញាធរបារាំង នៅថ្ងៃពុធ (ទី13 ខែឧសភា ឆ្នាំ២០២៦) នេះ បានឃុំខ្លួនអ្នកដំណើរ និងនាវិកជាង ១.៧០០នាក់ នៅលើនាវាទេសចរណ៍មួយគ្រឿងដែលចតនៅទីក្រុង Bordeaux បន្ទាប់ពីអ្នកដំណើរម្នាក់បានបាត់បង់ជីវិត ដែលត្រូវបានសង្ស័យថា ដោយសារវីរុសណូរ៉ូ (NOROVIRUS)។

នាវារបស់ក្រុមហ៊ុន Ambassador Cruise Line ដែលភាគច្រើន ក្នុងចំណោមអ្នកដំណើរ ១.២៣៣នាក់ មកពីចក្រភពអង់គ្លេស ឬអៀរឡង់នោះ បានទៅដល់កំពង់ផែភាគខាងលិចនៃទីក្រុង Bordeaux កាលពីថ្ងៃអង្គារ។

មន្ត្រីសុខាភិបាលបានឲ្យដឹងថា អ្នកដំណើរវ័យ ៩០ឆ្នាំម្នាក់ នៅលើនាវា Ambition បានស្លាប់ ហើយមនុស្សប្រហែល ៥០នាក់ទៀត បានបង្ហាញរោគសញ្ញាពីការមានវីរុសណូរ៉ូ។ វីរុសណូរ៉ូនេះ គឺជាទម្រង់នៃជំងឺរលាកក្រពះពោះវៀន ដែលបណ្តាលឲ្យក្អួត និងរាគ ហើយងាយឆ្លង។

នាវាដែលបានចាកចេញពីកោះ Shetland កាលពីថ្ងៃទី៦ ខែឧសភា បានឈប់នៅទីក្រុង Belfast របស់ប្រទេសអៀរឡង់ខាងជើង ទីក្រុង Liverpool នៅចក្រភពអង់គ្លេស និងទីក្រុង Brest នៅប្រទេសបារាំង មុនពេលទៅដល់ទីក្រុង Bordeaux ជាកន្លែងដែលនាវានេះត្រូវបានគ្រោងចេញដំណើរទៅកាន់អេស្ប៉ាញ៕