បុគ្គលដែលដឹងពីបញ្ហានេះ បានបញ្ជាក់ថា អង្គការសន្ធិសញ្ញាអាត្លង់ទិកខាងជើង ឬអង្គការណាតូ (NATO) កំពុងមានគម្រោងអញ្ជើញតំណាងមកពីរដ្ឋឈូងសមុទ្រចំនួន ៤ ឲ្យចូលរួមកិច្ចប្រជុំកំពូលនៅទីក្រុង Ankara របស់ប្រទេសទួរគី ដោយសង្គ្រាមអ៊ីរ៉ង់ និងភាពរកាំរកូសក្នុងសម្ព័ន្ធមិត្តឆ្លងមហាសមុទ្រអាត្លង់ទិក ទំនងជានឹងគ្របដណ្ដប់យ៉ាងខ្លាំងលើកិច្ចពិភាក្សានេះ។

ប្រទេសទាំងនេះ ដែលមានបារ៉ែន គូវ៉ែត កាតា និងអេមីរ៉ាតអារ៉ាប់រួម សុទ្ធតែជាសមាជិកនៃគំនិតផ្តួចផ្តើមសហប្រតិបត្តិការអ៊ីស្តង់ប៊ុល (Istanbul Cooperation Initiative) ដែលជាភាពជាដៃគូ រវាងអង្គការណាតូ និងប្រទេសមិនមែនជាសមាជិក នៅតំបន់មជ្ឈិមបូព៌ាដ៏ទូលំទូលាយ។

បើយោងតាមអ្នកដែលបាននិយាយក្នុងលក្ខខណ្ឌមិនបញ្ចេញឈ្មោះ ដោយសារកិច្ចពិភាក្សានេះ គឺជាការសម្ងាត់ បានឲ្យដឹងថា រដ្ឋមន្ត្រីការបរទេសរបស់ប្រទេសទាំងនេះ ត្រូវបានគេរំពឹងថា នឹងត្រូវបានអញ្ជើញឲ្យចូលរួមកិច្ចប្រជុំ នៅរដ្ឋធានីរបស់ប្រទេសទួរគី នាថ្ងៃទី ៧-៨ ខែកក្កដា។ អ្នកនាំពាក្យរបស់អង្គការណាតូ បានបដិសេធមិនធ្វើការអត្ថាធិប្បាយអ្វីឡើយ ពាក់ព័ន្ធនឹងព័ត៌មាននេះ។

កិច្ចប្រជុំនេះបានកើតឡើងបន្ទាប់ពីភាពតានតឹងឆ្លងមហាសមុទ្រអាត្លង់ទិកកាន់តែខ្លាំងឡើង ជុំវិញសង្គ្រាម នៅអ៊ីរ៉ង់ បន្ទាប់ពីប្រធានាធិបតីអាមេរិក លោក Donald Trump បានរិះគន់សម្ព័ន្ធមិត្តណាតូ ដែលមិនបានជួយបើកច្រកសមុទ្រ Hormuz ឡើងវិញ ហើយក្រោយមកបានប្រកាសដកកងទ័ពប្រហែល ៥.០០០នាក់ចេញពីប្រទេសអាល្លឺម៉ង់៕