ស្រ្តីជាម្តាយមានកូន ៦នាក់ Zainab Abu Samaan និយាយថា ការបញ្ជាឲ្យជម្លៀសខ្លួនរបស់អ៊ីស្រាអែល ធ្វើឲ្យគាត់នឹកឃើញការចងចាំដ៏ជូរចត់មួយនៃសង្រ្គាម ពេលដែលគាត់បានរត់ភៀសខ្លួនចេញពីផ្ទះរបស់គាត់នៅជំរំ al-Shati ស្ថិតក្នុងទីក្រុងហ្កាហ្សា មុនពេលការវាយប្រហារត្រូវចំតំបន់ក្បែរនោះ ។

ពេលដែលរូបគាត់ និងគ្រួសាររបស់គាត់វិលត្រឡប់ទៅកាន់ផ្ទះល្វែងរបស់ពួកគេវិញ អ្នកស្រី Abu Samaan មើលឃើញផ្ទះល្វែងរបស់គាត់កាន់តែរងការខូចខាតខ្លាំងជាងមុន ។

ស្រ្តីវ័យ ៤៣ឆ្នាំរូបនេះ បានជម្លៀសខ្លួនច្រើនលើកច្រើនសារមកហើយ ក្រោយសង្រ្គាមហ្កាហ្សា ចាប់ផ្តើមកាលពីឆ្នាំ ២០២៣ ហើយអ្នកស្រីនិយាយថា អ្នកស្រីបានវិលត្រឡប់មកសាងសង់លំនៅដ្ឋានរបស់គាត់ឡើងវិញ ក្រោយបទឈប់បាញ់ដ៏ផុយស្រួយកាលពីខែតុលា ឆ្នាំ ២០២៥ ។

អ្នកស្រីបន្តថា ពួកយើងមិនចង់រំឭករឿងរ៉ាវដ៏ឈឺចាប់នោះទេ ជាទីកន្លែងដែលពួកយើងធ្លាប់រស់នៅកាលពីមុន ។

គួរឲ្យដឹងថា អ៊ីស្រាអែលបានបង្កើនការវាយប្រហាររបស់ខ្លួន នៅក្នុងតំបន់ហ្កាហ្សា រយៈពេល ៥សប្តាហ៍ ចាប់តាំងពីបញ្ឈប់ការទម្លាក់គ្រាប់បែករួមគ្នាជាមួយសហរដ្ឋអាមេរិក នៅក្នុងប្រទេសអ៊ីរ៉ង់ ដោយបង្វែរការបាញ់ប្រហាររបស់ខ្លួនត្រឡប់ទៅលើដែនដីប៉ាឡេស្ទីនរងការបំផ្លិចបំផ្លាញនេះវិញ ជាកន្លែងដែលពួកគេជឿថា ក្រុមជីវពលហាម៉ាស កំពុងពង្រឹងកម្លាំងរបស់ខ្លួនឡើងវិញ ។

យោងតាមការអះអាងរបស់ក្រសួងសុខាភិបាលហ្កាហ្សា បានឲ្យដឹងថា ជនប៉ាឡេស្ទីនចំនួន ១២០ នាក់ ត្រូវបានសម្លាប់ នៅក្នុងតំបន់ហ្កាហ្សា ចាប់តាំងពីសង្គ្រាមអ៊ីរ៉ង់ ត្រូវបានផ្អាកកាលពីថ្ងៃទី ៨ ខែមេសា ។

ក្រុមមន្រ្តីក្នុងស្រុកនិយាយថា ជនប៉ាឡេស្ទីនយ៉ាងហោច ៨៥០នាក់ ត្រូវបានសម្លាប់ ចាប់តាំងពីបទឈប់បាញ់ចូលជាធរមាន កាលពីខែតុលា ឆ្នាំ ២០២៥ ខណៈអ៊ីស្រាអែលនិយាយថា ក្រុមជីវពលបានសម្លាប់ទាហានរបស់ខ្លួន ៤នាក់ អំឡុងពេលតែមួយ ៕