ក្រសួងការបរទេសអារ៉ាប់រួមបានបដិសេធកាលពី​ថ្ងៃពុធ ​​១៣​​ឧសភា ​សប្ដាហ៍នេះ ​នូវសេចក្តីថ្លែងការណ៍មួយរបស់ការិយាល័យនាយករដ្ឋមន្ត្រីអ៊ីស្រាអែលលោក​​ Benjamin Netanyahu ដែលថាលោកបានទៅទស្សនកិច្ចប្រទេសនេះ និងបានជួបជាមួយប្រធានាធិបតីរបស់ខ្លួន ​ខណៈ​អ៊ីរ៉ង់​ព្រមាន​​ថា​ខ្លួន​នឹង​មិនអត់​ឱនឲ្យ​ឡើយ​ចំពោះការឃុបឃិតណាមួយ។​​

ការិយាល័យនាយករដ្ឋមន្ត្រីអ៊ីស្រាអែលបាននិយាយថា ថ្មីៗនេះ​ លោកបានធ្វើដំណើរទៅកាន់អេមីរ៉ាតអារ៉ាប់រួមក្នុងអំឡុងពេលសង្គ្រាមជាមួយអ៊ីរ៉ង់ និងបានជួបជាមួយលោកប្រធានាធិបតី​​​ Sheikh Mohammed bin Zayed។

សេចក្តីថ្លែងការណ៍មួយរបស់ក្រសួងការបរទេសអារ៉ាប់រួមបាននិយាយថា ទំនាក់ទំនងអារ៉ាប់រួមជាមួយអ៊ីស្រាអែលគឺជាសាធារណៈនិងមិនផ្អែកលើការរៀបចំដែលមិនមានតម្លាភាព ឬក្រៅផ្លូវការនោះទេ។

សេចក្តីថ្លែងការណ៍នេះបាននិយាយថា ការអះអាងណាមួយទាក់ទងនឹងដំណើរទស្សនកិច្ចដែលមិនបានប្រកាស ឬការរៀបចំដែលមិនបានបង្ហាញ ​គឺគ្មានមូលដ្ឋានទាំងស្រុងទេ លុះត្រាតែមានការប្រកាសជាផ្លូវការដោយអាជ្ញាធរពាក់ព័ន្ធនៅក្នុងប្រទេស​អារ៉ាប់រួម។​

ការិយាល័យរបស់លោក Netanyahu និយាយថា កិច្ចប្រជុំនេះបាននាំឱ្យមានការទម្លាយភាព​ទាល់​ច្រក​​​ប្រវត្តិសាស្ត្រ​ក្នុងទំនាក់ទំនងរវាងប្រទេសទាំងពីរ។

ប្រភពមួយដែល​បានដឹង​អំពីកិច្ចប្រជុំនេះ និយាយថាលោក Netanyahu និងលោក Sheikh Mohammed បានជួបគ្នានៅទីក្រុង​ Al-Ain ដែលជាទីក្រុងធំបំផុត​ទី​​៣​ ​ដ៏ស្រស់បំព្រងមួយនៅជាប់ព្រំដែន អូម៉ង់ នៅថ្ងៃទី២៦​ ខែមីនា ហើយកិច្ចប្រជុំរបស់មេដឹកនាំ​ទាំងពីរ​មានរយៈពេលច្រើនម៉ោង។

ប្រភពព័ត៌មាននិយាយថា ប្រធានចារកម្ម​ Mossad លោក Dedi Barnea បានធ្វើដំណើរទៅអារ៉ាប់រួម យ៉ាងហោចណាស់ពីរដងក្នុងអំឡុងពេលសង្គ្រាមជាមួយអ៊ីរ៉ង់ ដើម្បីសម្របសម្រួលសកម្មភាពយោធា។ដំណើរទស្សនកិច្ចរបស់ប្រធានចារកម្មរូបនេះត្រូវបានរាយការណ៍ជាលើកដំបូងដោយសារព័ត៌មាន​ Wall Street Journal៕