វិមានក្រឹមឡាំងបាននិយាយកាលពីថ្ងៃពុធ ទី១៣ ខែឧសភា ថា អភិបាលតំបន់ Belgorod និងតំបន់ Bryansk របស់រុស្ស៊ី លោក Vyacheslav Gladkov និងលោក Alexander Bogomaz បានលាលែងពីតំណែងតាមការស្នើសុំរបស់ពួកគេផ្ទាល់។

លោក Alexander Shuvaev ត្រូវបានតែងតាំងជាអភិបាលស្តីទីនៃតំបន់ Belgorod ខណៈលោក Yegor Kovalchuk ត្រូវបានតែងតាំងជាអភិបាលស្តីទីនៃតំបន់ Bryansk។

យោងតាមវិមានក្រឹមឡាំងបានឲ្យដឹងថា ប្រធានាធិបតីរុស្ស៊ី លោក Vladimir Putin បានជួបអភិបាលតំបន់ថ្មីទាំងលោក Shuvaev និងលោក Kovalchuk បន្ទាប់ពីការតែងតាំងរបស់ពួកគេ។ តំបន់ទាំងពីរមានព្រំដែនជាប់ប្រទេសអ៊ុយក្រែន ហើយជារឿយៗត្រូវបានកងកម្លាំងអ៊ុយក្រែនដាក់គោលដៅ។

នៅព្រឹកព្រលឹមថ្ងៃព្រហស្បតិ៍ ទី១៤ ខែឧសភានេះ មន្ត្រីអ៊ុយក្រែនបាននិយាយថា រុស្ស៊ីបានវាយប្រហារលើរដ្ឋធានីគីវដោយយានដ្រូន និងមីស៊ីលដោយបានបំផ្លាញអគារជាច្រើនកន្លែង ហើយអ្នកស្រុកមួយចំនួនទំនងជាត្រូវជាប់ខ្លួននៅក្រោមគំនរបាក់បែក។

វីដេអូរបស់សារព័ត៌មាន Reuters នៅថ្ងៃព្រហស្បតិ៍នេះបានបង្ហាញពីអង្គភាពសេវាសង្គ្រោះបន្ទាន់នៅកន្លែងកើតហេតុ កំពុងធ្វើការនៅលើគំនរបាក់បែកដើម្បីស្វែងរកជនរងគ្រោះ។