ភ្នំពេញ៖ រណ្ដាប់ទទួលទេវតាត្រូវបានរៀបចំនៅតាមគេហដ្ឋាន ដើម្បីទទួលទេវតាឆ្នាំថ្មីឆ្នាំខាលដែលចូលមកជំនួសទេវតាឆ្នាំចាស់ឆ្នាំឆ្លូវ។ នេះជាទិដ្ឋភាពនៃថ្ងៃចូលឆ្នាំថ្ងៃដំបូង ដែលបង្ហាញពីភាពសប្បាយរីករាយរបស់ប្រជាពលរដ្ឋ។ ទិដ្ឋភាពនេះខុសដាច់ស្រឡះពីថ្ងៃចូលឆ្នាំប្រពៃណីជាតិកាលពីឆ្នាំមុន។
រណ្ដាប់ទទួលទេវតារួមមាន បាយសី ផ្កាស្រស់ ផ្លែឈើ ភេសជ្ជៈ និងរបស់ចាំបាច់ជាច្រើនទៀតត្រូវបានរៀបចំនៅតាមគេហដ្ឋានរបស់ប្រជាពលរដ្ឋ សម្រាប់ការទទួលទេវតាឆ្នាំថ្មីឆ្នាំខាលដែលមកជំនួសទេវតាឆ្នាំចាស់ឆ្នាំឆ្លូវ។ នាឱកាសរៀបចំរណ្ដាប់ទទួលទេវតាឆ្នាំថ្មីនៅថ្ងៃនេះ ប្រជាពលរដ្ឋលើកឡើងថា ចូលឆ្នាំខ្មែរឆ្នាំនេះគឺខុសគ្នាដាច់ស្រឡះពីចូលឆ្នាំខ្មែរឆ្នាំមុន។ ភាពខុសគ្នាគឺដោយសារកំឡុងពេលចូលឆ្នាំប្រពៃណីជាតិខ្មែរឆ្នាំ២០២១ ជាកំឡុងពេលបិទខ្ទប់ដោយសារកូវីដ-១៩ កំពុងមានការរីករាលដាលខ្លាំង។ ការបិទខ្ទប់កំឡុងពេលនោះ គ្រួសារមួយចំនួនក៏មិនបានសូម្បីតែរៀបចំរណ្ដាប់ទទួលទេវតាឆ្នាំថ្មី។ ពួកគាត់នៅពេលនេះលើកឡើងពីភាពសប្បាយរីករាយ ដែលរដ្ឋាភិបាលកម្ពុជាអាចអនុញ្ញាតឱ្យរៀបចំពិធីបុណ្យចូលឆ្នាំប្រពៃណីជាតិខ្មែរ អនុញ្ញាតឱ្យមានការដើរកម្សាន្ត និងអរគុណដល់រាជរដ្ឋាភិបាលកម្ពុជាដែលបានផ្ដល់ការចាក់វ៉ាក់សាំងជូនប្រជាពលរដ្ឋ ទើបសង្គមជាតិអាចរៀបចំពិធីបុណ្យចូលឆ្នាំប្រពៃណីជាតិខ្មែរនេះបាន។
ការរៀបចំប្រារព្ធពិធីចូលឆ្នាំប្រពៃណីជាតិខ្មែរឆ្នាំ២០២២ នេះជាការរៀបចំលើកដំបូងរបស់កម្ពុជាក្រោយមានវត្តមានកូវីដ។ តាមរាជធានី-ខេត្តជាច្រើនក៏បានរៀបចំកម្មវិធីសង្ក្រាន្ត និងតុបតែងយ៉ាងស្រស់ស្អាតដើម្បីផ្ដល់ភាពសប្បាយជូនប្រជាពលរដ្ឋ។ ការរៀបចំកម្មវិធីចូលឆ្នាំប្រពៃណីជាតិខ្មែរនេះ ក៏ស្របពេលដែលកម្ពុជាមានករណីឆ្លងកូវីដធ្លាក់ចុះមកត្រឹម ២ខ្ទង់ប្រចាំថ្ងៃ និងស្របពេលដែលកម្ពុជាសម្រេចជោគជ័យធំធេង លើការចាក់វ៉ាក់សាំងជូនប្រជាពលរដ្ឋ។ ជាក់ស្ដែងការចាក់វ៉ាក់សាំងនៅកម្ពុជាគិតត្រឹមថ្ងៃទី១៣ ខែមេសា ឆ្នាំ២០២២ គឺកម្ពុជាសម្រេចការចាក់បាន ៩២,៨១% នៃចំនួនប្រជាជនសរុប ១៦លាននាក់៕
អត្ថបទ៖ គឹម ហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
