អ្នកនាំពាក្យកងទ័ពអ៊ីរ៉ង់ លោក Mohammad Akraminia បាននិយាយថា ផលចំណេញសេដ្ឋកិច្ចដែលទីក្រុងតេអេរ៉ង់ នឹងបានពីការគ្រប់គ្រងច្រកសមុទ្រហ័រមូស ត្រូវបានគេរំពឹងថា នឹងច្រើនជាងប្រាក់ចំណូលនាំចេញប្រេងរបស់ខ្លួនទ្វេដង។

ទីភ្នាក់ងារសារព័ត៌មាន ISNA បានដកស្រង់សម្តីរបស់លោកដែលបាននិយាយថា៖«ផ្នែកខាងលិចនៃផ្លូវទឹកបច្ចុប្បន្ន ត្រូវបានគ្រប់គ្រងដោយកងទ័ពជើងទឹកនៃកងឆ្មាំបដិវត្តន៍ឥស្លាម ខណៈដែលកងកម្លាំងកងទ័ពជើងទឹក គ្រប់គ្រងផ្នែកខាងកើត។ ការគ្រប់គ្រងរបស់យើងលើច្រកសមុទ្រហ័រមូស នឹងមិនត្រឹមតែផ្តល់ប្រាក់ចំណូលសេដ្ឋកិច្ចដ៏អស្ចារ្យសម្រាប់ប្រទេសរបស់យើងប៉ុណ្ណោះទេ គឺទ្វេដងនៃប្រាក់ចំណូលប្រេងរបស់ខ្លួន ប៉ុន្តែយើងក៏បន្តពង្រឹងជំហរគោលនយោបាយការបរទេសរបស់យើងផងដែរ»។

លោក Akraminia បានចង្អុលបង្ហាញថា វត្តមានកងទ័ពជើងទឹករបស់អ៊ីរ៉ង់ នៅក្នុងច្រកសមុទ្រហ័រមូស នឹងរារាំងសហរដ្ឋអាមេរិកពីការស្តារឡើងវិញនូវមូលដ្ឋានយោធារបស់ខ្លួន នៅក្នុងប្រទេសឈូងសមុទ្រ។ យោងតាមអ្នកនាំពាក្យកងទ័ពអ៊ីរ៉ង់រូបនេះ ទីក្រុងវ៉ាស៊ីនតោននឹងបាត់បង់ទីតាំងរបស់ខ្លួនទាំងស្រុង នៅមជ្ឈិមបូព៌ា នាពេលឆាប់ៗនេះ។

សហរដ្ឋអាមេរិក និងអ៊ីស្រាអែល បានចាប់ផ្តើមសង្គ្រាមប្រឆាំងនឹងអ៊ីរ៉ង់ នៅថ្ងៃទី ២៨ ខែកុម្ភៈ។ ទីក្រុងសំខាន់ៗរបស់អ៊ីរ៉ង់ រួមទាំងទីក្រុងតេអេរ៉ង់ ត្រូវបានវាយប្រហារ។ កងឆ្មាំបដិវត្តន៍ឥស្លាមអ៊ីរ៉ង់បានប្រកាសពីប្រតិបត្តិការសងសឹកមួយ ដោយកំណត់គោលដៅលើទីតាំងនានា នៅក្នុងប្រទេសអ៊ីស្រាអែល។ មូលដ្ឋានយោធាអាមេរិកនៅប្រទេសបារ៉ែន ហ្ស៊កដានី កូវ៉ែត កាតា អារ៉ាប៊ីសាអ៊ូឌីត និងអេមីរ៉ាតអារ៉ាប់រួម ក៏ត្រូវបានវាយប្រហារផងដែរ។ អាជ្ញាធរអ៊ីរ៉ង់ក៏បានសម្រេចចិត្តបិទច្រកសមុទ្រហ័រមូសចំពោះនាវាដែលមានទំនាក់ទំនងជាមួយសហរដ្ឋអាមេរិក អ៊ីស្រាអែល និងប្រទេសដែលគាំទ្រការឈ្លានពានប្រឆាំងនឹងទីក្រុងតេ អេរ៉ង់៕