ប្រេស៊ីល បាននិយាយកាលពីថ្ងៃពុធថា ប្រទេសនេះនឹងផ្តល់ការឧបត្ថម្ភធនដោយផ្ទាល់សម្រាប់ក្រុមហ៊ុនផលិត និងក្រុមហ៊ុននាំចូលប្រេងសាំង និងប្រេងម៉ាស៊ូត នៅពេលបន្ទាប់។ ការផ្តល់នេះ ធ្វើឡើងបន្ទាប់ពីសំណើកាត់ពន្ធប្រេងឥន្ធនៈសហព័ន្ធដែលជាប់គាំងនៅក្នុងសភា។ រដ្ឋាភិបាល បាននិយាយថា ការចំណាយប្រចាំខែលើការឧបត្ថម្ភធនឧស្ម័ននឹងកើនឡើងដល់ប្រហែល២៣៨លានដុល្លារ ដោយក្រោយមកការគាំទ្រប្រេងម៉ាស៊ូត នឹងត្រូវចំណាយរហូតដល់ ៣៣៨លានដុល្លារ។

រដ្ឋមន្ត្រីក្រសួងរ៉ែ និងថាមពល លោក Alexandre Silveira បានអំពាវនាវដល់ឧស្សាហកម្ម ឱ្យធ្វើការជាមួយរដ្ឋាភិបាល ដោយនិយាយថា លោកបានធ្វើការអំពាវនាវដល់ក្រុមហ៊ុនចែកចាយ និងស្ថានីយប្រេងឥន្ធនៈ ពន្លឿនដំណើរការនៃការអនុម័តវិធានការទាំងនេះដែលធ្វើឡើងដោយរដ្ឋាភិបាលសហព័ន្ធ។ ប្រធានាធិបតីរបស់ប្រទេស បានប្តេជ្ញាយ៉ាងមុតមាំក្នុងការការពារសេដ្ឋកិច្ចជាតិ ការពារប្រជាជនប្រេស៊ីល និងផ្តល់លទ្ធផលប្រកបដោយប្រសិទ្ធភាព ដើម្បីអាចបន្តភាពរីកចម្រើនបាន។

ចាប់តាំងពីសង្គ្រាមរបស់សហរដ្ឋអាមេរិក និងអ៊ីស្រាអែល លើអ៊ីរ៉ង់បានចាប់ផ្តើមមក តម្លៃប្រេងឥន្ធនៈខ្ពស់បានក្លាយជាក្តីបារម្ភដ៏ធំមួយសម្រាប់លោកប្រធានាធិបតី Luiz Inacio Lula da Silva ជាអ្នកដែលត្រូវបានគេរំពឹងថានឹងឈរឈ្មោះក្នុងបោះឆ្នោតជាថ្មីនៅឆ្នាំនេះ។ កាលពីចុងខែមេសា រដ្ឋាភិបាលបានបង្ហាញសេចក្តីស្នើច្បាប់មួយ ដែលប្រាក់ចំណូលបន្ថែមពីតម្លៃប្រេងខ្ពស់នឹងទូទាត់ការកាត់បន្ថយពន្ធសហព័ន្ធលើប្រេងសាំង និងសារធាតុអេតាណុល។

ទោះជាយ៉ាងណា សភានៅមិនទាន់បានបោះឆ្នោតលើសេចក្តីស្នើច្បាប់នេះនៅឡើយទេ ដែលជំរុញឱ្យរដ្ឋាភិបាលអនុម័តយន្តការឧបត្ថម្ភធនជំនួស។