យោងតាមប្រព័ន្ធផ្សព្វផ្សាយរដ្ឋ បាន​ឲ្យ​ដឹង​ថា ប្រធានាធិបតីចិន លោក ស៊ី ជីនពីង (Xi Jinping) នៅ​ថ្ងៃព្រហស្បតិ៍ (ទី១៤ ខែឧសភា ឆ្នាំ២០២៦) នេះ​ បានព្រមានថា ប្រទេស​ចិន និងសហរដ្ឋអាមេរិក អាចមាន​ការប៉ះទង្គិច​គ្នា​មិន​ខាន​ ប្រសិនបើបញ្ហាកោះ​តៃវ៉ាន់ «មិនត្រូវបានដោះស្រាយឲ្យ​បានត្រឹមត្រូវ» ទេនោះ​។

បើយោងតាមទីភ្នាក់ងារសារព័ត៌មាន Xinhua បាន​ឲ្យ​ដឹង​ថា ខណៈពេលដែលលោកបានស្វាគមន៍លោក Donald Trump នៅឯមហាសាលប្រជាជនចិន​ ដែលជាអគាររៀប​ចំ​ពិធីផ្លូវ​ការ​រដ្ឋរបស់​ប្រទេស​​ចិន លោក ស៊ី បានប្រាប់ប្រធានាធិបតីអាមេរិករូប​នេះ​ថា ស្ថានភាព​កោះ​តៃវ៉ាន់​ គឺជា «បញ្ហាដ៏​សំខាន់បំផុត នៅក្នុង​ទំនាក់ទំនង​ចិន-អាមេរិក​»​

លោកបានមានប្រសាសន៍បន្ត​ថា៖ «ប្រសិនបើបញ្ហានោះ​ត្រូវបានដោះស្រាយយ៉ាង​ត្រឹមត្រូវ ទំនាក់ទំនងទ្វេភាគី នឹងទទួលបានស្ថិរភាពជារួម។ តែ​បើមិនដូច្នោះទេ ប្រទេសទាំង២ នឹងមានការប៉ះទង្គិចគ្នា និងសូម្បីតែអាច​មាន​ជម្លោះផង​ដែរ​ ដែលធ្វើឲ្យ​ទំនាក់ទំនងទាំងមូល​ស្ថិតក្នុង​ហានិភ័យ​យ៉ាងខ្លាំង»។

លោក ស៊ី បានបញ្ជាក់​ទៀត​ថា សន្តិភាពនៅទូទាំងច្រកសមុទ្រតៃវ៉ាន់ «មិនអាចផ្សះផ្សាបានឡើយ ប្រៀប​ដូច​ភ្លើង និងទឹក» ប្រសិន​បើ​​កោះ​តៃវ៉ាន់ទទួល​បាន​ឯករាជ្យ​។ លោកបានសង្កត់ធ្ងន់​ថា៖ «ការការពារសន្តិភាព និងស្ថិរភាព នៅទូទាំងច្រកសមុទ្រតៃវ៉ាន់ គឺជាចំណុច​​រួមដ៏ធំបំផុតរវាងប្រទេសទាំង២»៕