មន្ត្រីសេតវិមានម្នាក់ បានបញ្ជាក់ថា ប្រធានាធិបតីអាមេរិក លោក Donald Trump និងសមភាគី​ចិនរបស់លោក គឺ​លោក ស៊ី ជីនពីង (Xi Jinping)​ បានបញ្ចប់កិច្ចពិភាក្សានៅទីក្រុងប៉េកាំងហើយ​ នា​ថ្ងៃព្រហស្បតិ៍ (ទី១៤ ខែឧសភា ឆ្នាំ២០២៦) នេះ។ កិច្ចពិភាក្សានេះ ដែលមានរយៈពេលជាង ២ម៉ោង បានឃើញមេដឹកនាំកំពូល​​ទាំង២ ដោះស្រាយបញ្ហាលំបាកស្មុគស្មាញ​នានា​ ក្នុង​នោះ​រួមទាំងស្ថានភាព​តៃវ៉ាន់ ជាកោះស្វ័យ​គ្រប់គ្រង​ប្រកាន់​លទ្ធិ​ប្រជាធិបតេយ្យ ដែលទីក្រុងប៉េកាំងអះអាងថា ជាផ្នែក​នៃ​ដែន​ដី​របស់ខ្លួន​។

នៅពេលចាប់ផ្តើមកិច្ចប្រជុំកំពូលដែលគ្រប់គ្នា​ទន្ទឹង​រង់ចាំ​យ៉ាង​ខ្លាំងនោះ​​ មេដឹកនាំទាំង២ បានបង្ហាញនូវសំឡេង​​សុទិដ្ឋិនិយម ដោយសង្កត់ធ្ងន់លើលទ្ធភាពមាន​កិច្ចសហការ ខណៈដែលលោក ស៊ី បានគូសបញ្ជាក់ពីកោះ​តៃវ៉ាន់ថា ជាបញ្ហាចម្បង នៅក្នុងទំនាក់ទំនងទ្វេភាគី។

បញ្ហាកោះតៃវ៉ាន់ ដែលលោក ស៊ី​ ចាត់ទុក​ថា ជា​ «បញ្ហាសំខាន់បំផុត» នៅក្នុងទំនាក់ទំនងទ្វេភាគី បានលេច​ឡើង​បន្ទាប់ពីមាន​នូវ​ការថ្លែងសុន្ទរកថាបើកដ៏រីករាយដោយមេដឹកនាំទាំង២។

ជាមួយ​គ្នា​នេះ លោក ស៊ី​ បានលើក​ឡើង​នៅក្នុងសុន្ទរកថាបើករបស់លោកថា៖ «យើងគួរតែជាដៃគូ មិនមែនជាគូអរិ​ននោះ​ទេ។ យើងគួរតែជួយគ្នាទៅវិញទៅមកឲ្យទទួលបានជោគជ័យ និងរីកចម្រើនជាមួយគ្នា ហើយស្វែងរកវិធី​ដ៏​ត្រឹមត្រូវ​​ ដើម្បី​ឲ្យ​ប្រទេសធំៗ រួម​រស់នៅជាមួយគ្នាដោយ​មិន​មាន​ជម្លោះ​ នៅក្នុងយុគសម័យថ្មី»។

ជាង​នេះ​ទៀត លោក​បប្រធានាធិបតីចិនក៏បានសាទរ ចំពោះការចរចាពាណិជ្ជកម្មប្រកប​ដោយ​ភាព​វិជ្ជមានជាមួយសហរដ្ឋអាមេរិកផងដែរ។ មេដឹកនាំទាំង២​ បានជួបពិភាក្សា​ជាមួយ​គ្នា នៅមហាសាលប្រជាជនចិន​ នៅព្រឹកថ្ងៃព្រហស្បតិ៍នេះ​ បន្ទាប់ពីមាន​នូវ​ពិធីស្វាគមន៍ដោយ​ឆ្មាំកិត្តិយស និងក្បួន​ដ៏អធិកអធម​​​ដែលត្រូវបានរៀបចំឡើង​យ៉ាងយកចិត្តទុកដាក់៕