ប្រធានាធិបតីហ្វីលីពីន បានបញ្ជាឲ្យ​បើក​កិច្ចប្រជុំបន្ទាន់មួយរបស់មន្ត្រីជាន់ខ្ពស់ នៅថ្ងៃព្រហស្បតិ៍ (ទី១៤ ខែឧសភា ឆ្នាំ២០២៦) នេះ​ ក្នុង​ពេលមានភាពតានតឹងផ្នែកនយោបាយកាន់តែខ្លាំងឡើងៗ ពោល​គឺ​មួយថ្ងៃបន្ទាប់ពីស្នូរកាំភ្លើង​ បានបន្លឺ​​ឡើង នៅព្រឹទ្ធសភា ជាទី​ដែលសមាជិកសភាមួយ​រូប​ដែលតុលាការព្រហ្មទណ្ឌអន្តរជាតិ (ICC) ត្រូវការ​ខ្លួន​ បានទៅ​សម្ងំ​លាក់ខ្លួននៅក្នុង​នោះ​ដោយសារខ្លាចមានការចាប់ខ្លួនលោក​។

សមាជិកព្រឹទ្ធសភា លោក​ Ronald dela Rosa ដែល​ជា​អតីតប្រមុខ​នគរបាល​ជាតិ និងជាអ្នក​អនុវត្ត​ដ៏​សំខាន់​ អំឡុង​ «សង្គ្រាមប្រឆាំងគ្រឿងញៀន» របស់អតីតប្រធានាធិបតី លោក Rodrigo Duterte ត្រូវបានតាម​ស្វែង​ចាប់ខ្លួន​ ពាក់​ព័ន្ធ​នឹង​បទឧក្រិដ្ឋកម្មប្រឆាំងមនុស្សជាតិ ជាបទចោទដូចគ្នាដែល​​លោក Duterte ត្រូវបាន​ចោទ​ប្រកាន់ជាផ្លូវវការ​។ លោក Duterte នឹងក្លាយជាអតីតប្រមុខរដ្ឋអាស៊ីដំបូងគេដែលត្រូវបានកាត់ទោសនៅ ICC។

គួរបញ្ជាក់ថា សំឡេងកាំភ្លើងត្រូវបានឮកាល​ពី​យប់​ថ្ងៃទី១៣ ខែឧសភា នៅខាងក្នុងអគារព្រឹទ្ធសភា ហើយមនុស្សម្នា​បានប្រញាប់ប្រញាល់​នាំ​រត់រក​កន្លែង​លាក់​ខ្លួន ដោយ​ហេតុការណ៍​នោះ​បាន​កើត​ឡើង​ប៉ុន្មាន​ម៉ោងបន្ទាប់ពីលោក dela Rosa ដែលត្រូវបានគេស្គាល់ថា Bato ឬ Rock បានអំពាវនាវតាម​បណ្ដាញ​សង្គមឲ្យ​អ្នកគាំទ្រប្រមូលផ្តុំ។ លោកបាននិយាយថា ភ្នាក់ងារអនុវត្តច្បាប់កំពុងមកយករូប​លោកចេញពីសភា ជាកន្លែងដែលលោកបានទៅជ្រកកោន។

ហេតុការណ៍នេះបានបង្កឲ្យ​មានភាពវឹកវរ និងភាពច្របូកច្របល់ ដោយមានវត្តមានយ៉ាងច្រើននូវ​កងកម្លាំង​នគរបាល​ និងឆ្មាំប្រដាប់អាវុធ នៅព្រឹទ្ធសភា ការតវ៉ានៅខាងក្រៅ ហើយ​ការបាញ់កាំភ្លើង​ជាង ១០​គ្រាប់កើត​ឡើង​ភ្លាមៗបន្ទាប់ពីកងម៉ារីនត្រូវបានស្នើ​សុំ​ជាជំនួយ​​ ដើម្បី​ពង្រឹងសន្តិសុខ។ ប្រធានាធិបតី លោក Ferdinand Marcos Jr បានជួបជាមួយមន្ត្រី​រដ្ឋាភិបាល និងប្រមុខ​សន្តិសុខនៅថ្ងៃទី១៤ ខែឧសភានេះ​៕