នៅថ្ងៃព្រហស្បតិ៍នេះ គ្រួសារជនរងគ្រោះសង្រ្គាមគ្រឿងញៀន និយាយថា ពួកគេមានការខកចិត្តជាខ្លាំង កាលដែលសមាជិព្រឹទ្ធសភាលោក Ronald dela Rosa ដែលចង់បានខ្លួនដោយតុលាការព្រហ្មទណ្ឌអន្តរជាតិ(ICC) ពុំទាន់ត្រូវបានចាប់ខ្លួន ក្រោយរូបលោករត់គេចខ្លួន បើទោះបីជាមានវត្តមានដ៏ច្រើនរបស់នគរបាល និងឆ្មាំប្រដាប់អាវុធនៅព្រឹទ្ធសភាក៏ដោយ ។

សំឡេងស្នូរគ្រាប់កាំភ្លើង ត្រូវបានបន្លឺឡើងកាលពីយប់ថ្ងៃពុធ នៅក្នុងព្រឹទ្ធសភា ហើយមនុស្សនៅទីនោះបានរត់រកកន្លែងលាក់ខ្លួន រយៈពេលប៉ុន្មានម៉ោងប៉ុណ្ណោះ ក្រោយលោក Dela Rosa វ័យ ៦២ឆ្នាំ អំពាវនាវនៅលើបណ្តាញព័ត៌មានសង្គមឲ្យអ្នកគាំទ្ររបស់លោកចល័ត ដោយរូបលោកនិយាយថា ក្រុមភ្នាក់ងារអនុវត្តច្បាប់ កំពុងមកចាប់ខ្លួនរូបលោក ។

លោក Claire Castro គឺជាអនុរដ្ឋលេខាធិការទទួលបន្ទុកផ្នែកទំនាក់ទំនងប្រធានាធិបតី និយាយប្រាប់សន្និសីទសារព័ត៌មានថា លោក Dela Rosa លែងនៅក្នុងបរិវេនព្រឹទ្ធសភាទៀតហើយ ហើយគេក៏ពុំបានដឹងនោះដែរពីទីកន្លែងដែលគាត់នៅ ។

លោក Llore Pasco វ័យ ៧១ឆ្នាំ ដែលកូនប្រុស ២នាក់របស់លោក ត្រូវបានសម្លាប់ អំឡុងសង្រ្គាមគ្រឿងញៀនកាលពីឆ្នាំ ២០១៧ និយាយថា វាគឹជារឿងដ៏គួរឲ្យខកចិត្តជាខ្លាំង ។

លោកថា បើទោះបីជាមានវត្តមានយ៉ាងច្រើនរបស់នគរបាល និងឆ្មាំប្រដាប់អាវុធយ៉ាងណាក្តី គាត់នៅតែមិនត្រូវបានចាប់ខ្លួនដដែល ។ មាននូវហេតុផលមួយគត់ គឺមាននរណាម្នាក់អាចនឹងការពារគាត់ ហើយនិងអនុញ្ញាតឲ្យគាត់រត់គេច ។

លោក Dela Rosa ដែលជាអតីតស្នងការនគរបាលជាតិហ្វីលីពីន និងជាមន្រ្តីអនុវត្តច្បាប់ជាន់ខ្ពស់មួយរូបក្នុងសង្រ្គាមគ្រឿងញៀនរបស់លោកអតីតប្រធានាធិបតី Rodrigo Duterte នោះ ស្ថិតក្រោមការការពាររបស់ព្រឹទ្ធសភា ហើយត្រូវគេចង់បានខ្លួន សម្រាប់ឧក្រិដ្ឋកម្មប្រឆាំងមនុស្សជាតិ គឺជាករណីតែមួយដែលលោក Duterte ត្រូវបានតុលាការ ICC ចោទប្រកាន់ ៕