រដ្ឋមន្ត្រីការបរទេសអាមេរិក លោក Marco Rubio បានចោទជា​សំណួរឡើង​ ទាក់ទងនឹងអង្គការណាតូ (NATO) ក្នុងពេលមាន​សង្គ្រាមជាមួយអ៊ីរ៉ង់ ដោយរិះគន់ប្រទេសអេស្ប៉ាញ ចំពោះការបដិសេធយន្តហោះអាមេរិកមិនឲ្យ​ចូលប្រើប្រាស់មូលដ្ឋានរបស់ខ្លួន អំឡុងសង្គ្រាមនេះ​។

នៅក្នុងបទសម្ភាសន៍ជាមួយប្រព័ន្ធ​ផ្សព្វផ្សាយ Fox News ដែលបានចាក់ផ្សាយកាលពីថ្ងៃពុធ (ទី១៣ ខែឧសភា ឆ្នាំ២០២៦) ប៉ុន្តែត្រូវបានថតទុកកាលពីដើមសប្តាហ៍នេះ លោក Rubio បាននិយាយថា៖ «ហេតុផលមួយដែលខ្ញុំគាំទ្រអង្គការណាតូ គឺដោយសារតែវា​​ផ្តល់ឲ្យ​យើងនូវសិទ្ធិប្រើប្រាស់​មូលដ្ឋាន។ វា​អនុញ្ញាតឲ្យ​យើងមានមូលដ្ឋាននៅអឺរ៉ុបដែលយើងអាចប្រើប្រាស់ក្នុងករណីបន្ទាន់ ដូចជាបញ្ហា​នៅតំបន់​មជ្ឈិមបូព៌ា​ជាដើម​»។

លោកបាន​បន្ថែម​ថា ដូច្នេះនៅពេលដែលអ្នកត្រូវ​ដៃគូអង្គការណាតូបដិសេធអ្នកមិន​ឲ្យ​ប្រើប្រាស់មូលដ្ឋានទាំងនោះ ពោល​គឺ​នៅពេលដែលហេតុផលចម្បងដែលអង្គការណាតូអំណោយផល​ សម្រាប់សហរដ្ឋ​អាមេរិក ឥឡូវនេះត្រូវបានបដិសេធហើយ​នោះ ដោយមាន​ប្រទេសអេស្ប៉ាញជាឧទាហរណ៍ សួរថា តើគោលបំណងនៃសម្ព័ន្ធភាព គឺជាអ្វី? វាចាប់ផ្តើមក្លាយជារឿង ដែល​ថា ពួក​គេ​គឺជា​សម្ព័ន្ធមិត្ត នៅ​ពេល​ដែល​ពួកគេមាន​ប្រយោជន៍​ប៉ុណ្ណោះ»។

អេស្ប៉ាញបានបដិសេធយន្តហោះយោធាអាមេរិកមិនឲ្យ​ចូលប្រើប្រាស់មូលដ្ឋានទ័ពអាកាសរបស់ខ្លួន ក្នុងអំឡុងពេលមាន​ជម្លោះជាមួយ​អ៊ីរ៉ង់ ដែលជំរុញឲ្យ​មានការគំរាមកំហែងពីទីក្រុងវ៉ាស៊ីនតោន ក្នុង​ការហាមឃាត់ពាណិជ្ជកម្ម ការដកកងទ័ព និងសូម្បីតែការផ្អាកភាពជាសមាជិក​របស់​អង្គការណាតូ។

អមដោយការ​​បញ្ជាក់ថា មាន​​ប្រទេសមួយចំនួននៅក្នុងអង្គការណាតូ «ផ្ដល់​ប្រយោជន៍ខ្លាំងណាស់» ចំ​ពោះ​សហរដ្ឋអាមេរិក លោកបាន​និយាយ​ថា «ប្រទេសដទៃទៀត ដូចជាអេស្ប៉ាញ បានធ្វើ​នូវ​ទង្វើ​អាក្រក់ និង​គួរឲ្យ​ខ្លាច​រអាខ្លាំង​បំផុត​»៕