នា​ថ្ងៃព្រហស្បតិ៍ (ទី១៤ ខែឧសភា ឆ្នាំ២០២៦) នេះ បន្ទាប់ពីមាន​កិច្ចប្រជុំកំពូលអាមេរិក-ចិន នៅទីក្រុងប៉េកាំង សេតវិមានបានឲ្យ​ដឹង​ថា ប្រធានាធិបតីចិនលោក ស៊ី ជីនពីង (Xi Jinping) បានយល់ស្របជាមួយប្រធានាធិបតីអាមេរិកលោក Donald Trump ថា ច្រកសមុទ្រ Hormuz ត្រូវតែបន្ត​បើកចំហ​ដដែល​។

យោងតាមប្រព័ន្ធ​ផ្សព្វផ្សាយ​ ​​NBC News បាន​ឲ្យដឹង​ថា សេតវិមានបានចែករំលែកសេចក្តីថ្លែងការណ៍ អំពី​កិច្ចពិភាក្សា រវាងលោក Trump និងលោក ស៊ី​ ដោយមិនបានលើកឡើងពីបញ្ហាទាក់ទងនឹងកោះ​តៃវ៉ាន់ ហើយ​សំដៅយ៉ាងទូលំទូលាយទៅលើសង្គ្រាមអ៊ីរ៉ង់ និងច្រកសមុទ្រ Hormuz។

មន្ត្រីសេតវិមានមួយ​រូប​បាននិយាយថា៖ «លោកប្រធានាធិបតី Trump បានមាន​នូវ​ជំនួប​ដ៏ល្អជាមួយលោកប្រធានាធិបតី ស៊ី​ របស់​ប្រទេសចិន»។ មន្ត្រីរូបនេះបានបន្ថែម​ថា៖ «ភាគីទាំងពីរបានពិភាក្សា អំពីវិធី ដើម្បីបង្កើនកិច្ចសហប្រតិបត្តិការសេដ្ឋកិច្ច រវាងប្រទេសយើងទាំង២ ក្នុង​នោះ​រួមមាន​ទាំងការពង្រីកការចូលទីផ្សារ សម្រាប់ក្រុម​ហ៊ុន​អាមេរិកចូល នៅ​ក្នុងប្រទេសចិន និងការបង្កើនការវិនិយោគរបស់ចិន នៅក្នុងឧស្សាហកម្មរបស់យើង។ ថ្នាក់ដឹកនាំ​មកពីក្រុមហ៊ុនធំៗជាច្រើនរបស់សហរដ្ឋអាមេរិកបានចូលរួមជា​ផ្នែកមួយនៃកិច្ចប្រជុំ»

ជាមួយគ្នានេះ មន្ត្រីសេតវិមានរូប​នេះ​បានបន្ថែមថា៖ «ភាគីទាំង២ បានឯកភាពគ្នាថា ច្រកសមុទ្រ Hormuz ត្រូវតែបន្តបើកចំហដដែល ដើម្បីគាំទ្រដល់លំហូរថាមពលដោយសេរី។ លោក​ប្រធានាធិបតី ស៊ី ក៏បានបញ្ជាក់យ៉ាងច្បាស់ពីការជំទាស់របស់ចិន ចំពោះការធ្វើយោធាភាវូបនីយកម្ម នៅ​ច្រកសមុទ្រនេះ​ និងកិច្ចប្រឹងប្រែងណាមួយ ដើម្បីយក​ថ្លៃសេវា សម្រាប់ការប្រើប្រាស់របស់ផ្លូវ​នេះ​ ហើយលោកបានបង្ហាញចំណាប់អារម្មណ៍ ក្នុងការទិញប្រេងអាមេរិកបន្ថែមទៀត ដើម្បីកាត់បន្ថយការពឹងផ្អែករបស់ចិនលើច្រកសមុទ្រនេះ នាពេលអនាគត»។

ជាងនេះទៀត មន្ត្រីរូបនេះក៏បានកត់សម្គាល់ផងដែរថា «ប្រទេសទាំង២ បានឯកភាពគ្នាថា អ៊ីរ៉ង់មិនអាចមានអាវុធនុយក្លេអ៊ែរទេ»៕