ប្រធានាធិបតីអាមេរិក លោក​ Donald Trump បានពិភាក្សាអំពីសង្គ្រាមអ៊ីរ៉ង់ជាមួយប្រធានាធិបតីចិន លោក​ Xi Jinping នៅទីក្រុងប៉េកាំង នា​ថ្ងៃព្រហស្បតិ៍ (ទី១៤ ខែឧសភា ឆ្នាំ២០២៦) នេះ ខណៈដែលការវាយប្រហារថ្មីៗលើនាវា នៅជិតច្រកសមុទ្រ Hormuz បានរំលឹកអំពីការខាត​បង់​ដោយសារ​ការជាប់គាំងយូរអង្វែង ដោយការចរចាសន្តិភាពមិន​មាន​វឌ្ឈនភាព​សោះ​ឡើយ​។

បន្ទាប់ពីលោក Trump និងលោក Xi បានជួបពិភាក្សា​គ្នា មន្ត្រីសេតវិមានម្នាក់ បាននិយាយថា មេដឹកនាំបានឯកភាពគ្នាថា ច្រកសមុទ្រនេះគួរតែបន្ត​បើកចំហដដែល​ ហើយអ៊ីរ៉ង់មិនគួរមាន​អាវុធនុយក្លេអ៊ែរឡើយ​។ ចិនមានទំនាក់ទំនង​ជិតស្និទ្ធ​ជាមួយ​អ៊ីរ៉ង់ និងជាអ្នកទិញប្រេងសំខាន់របស់ប្រទេស​នេះ​។

អ៊ីរ៉ង់ភាគច្រើនបានបិទច្រកសមុទ្រ Hormuz មិនឲ្យនាវាឆ្លងកាត់ឡើយ​ ក្រៅពី​នាវា​របស់ខ្លួន​ ចាប់តាំងពីសហរដ្ឋអាមេរិក និងអ៊ីស្រាអែល បានចាប់ផ្តើមយុទ្ធនាការទម្លាក់គ្រាប់បែក កាលពី ២ខែកន្លះមុន ដែលបណ្តាលឲ្យ​មានការរំខានដ៏ធំបំផុតមិនធ្លាប់មានដល់​ការផ្គត់ផ្គង់ថាមពលពិភពលោក។ សហរដ្ឋអាមេរិក បានផ្អាកការទម្លាក់គ្រាប់បែកកាលពីខែមុន ប៉ុន្តែបានបន្ថែមការបិទផ្លូវកំពង់ផែរបស់អ៊ីរ៉ង់។

នៅក្នុងឧប្បត្តិហេតុចុងក្រោយបំផុតនៅលើផ្លូវពាណិជ្ជកម្មនេះ​ ប្រទេស​ឥណ្ឌាបានឲ្យ​ដឹង​ថា នាវាមួយគ្រឿងរបស់ខ្លួន ត្រូវបានវាយប្រហារនៅឯឆ្នេរសមុទ្រអូម៉ង់។ ទីក្រុង​ញូវដេលីមិនបានផ្តល់ព័ត៌មានលម្អិតបន្ថែមភ្លាមៗឡើយ ប៉ុន្តែបានបញ្ជាក់​ថា នាវិកទាំងអស់មានសុវត្ថិភាព។

ដោយឡែកទីភ្នាក់ងារសន្តិសុខដែនសមុទ្រអង់គ្លេស UKMTO បានរាយការណ៍នៅ​ថ្ងៃព្រហស្បតិ៍ថា «បុគ្គលិកដែលគ្មានការអនុញ្ញាត» បានឡើងលើនាវាមួយគ្រឿង​ដែលចតនៅឆ្នេរសមុទ្រនៃកំពង់ផែ Fujairah របស់ប្រទេស​អេមីរ៉ាតអារ៉ាប់រួម ហើយកំពុងបើកវាឆ្ពោះទៅកាន់អ៊ីរ៉ង់៕