​

ប្រធានាធិបតីបារាំង លោក Emmanuel Macron នៅ​ថ្ងៃព្រហស្បតិ៍ (ទី១៤ ខែឧសភា ឆ្នាំ២០២៦) នេះ បានថ្កោលទោសការវាយប្រហារដ៏ធំ​ដោយយានដ្រូន​ និងមីស៊ីលរបស់រុស្ស៊ី លើទីក្រុងគីវ ដោយបញ្ជាក់ថា វាបង្ហាញពី «ភាពទន់ខ្សោយ» និងអសមត្ថភាពរបស់ទីក្រុងមូស្គូ ក្នុងការ «បញ្ចប់សង្គ្រាមឈ្លានពានរបស់ខ្លួន»។

ការអត្ថាធិប្បាយរបស់លោកបានកើតឡើងបន្ទាប់ពីរុស្ស៊ីបានទម្លាក់គ្រាប់លើ​រដ្ឋធានីរបស់​ប្រទេស​អ៊ុយក្រែនអស់រយៈពេលជាច្រើនម៉ោង នា​ព្រឹកថ្ងៃព្រហស្បតិ៍ ដោយ​ប្រើប្រាស់​យានដ្រូន​រាប់រយគ្រឿង និងមីស៊ីលរាប់សិបគ្រាប់ ដែលបានសម្លាប់មនុស្សយ៉ាងហោចណាស់ ៥នាក់។

លោក Macron បានរៀប​រាប់​​នៅលើបណ្ដាញ​សង្គម X ថា៖ «ដោយមាន​ការទម្លាក់គ្រាប់បែកលើជនស៊ីវិល រុស្ស៊ីបាន​បង្ហាញ​ឲ្យ​ឃើញ​ភាពទន់ខ្សោយរបស់ខ្លួន ជាជាង​ភាពខ្លាំង​​។ ប្រទេស​នេះ​អស់ជម្រើសផ្នែក​សមរភូមិយោធា ហើយមិនដឹងពីរបៀបបញ្ចប់សង្គ្រាមឈ្លានពានរបស់ខ្លួនឡើយ​»។

គួរបញ្ជាក់​ថា រុស្ស៊ី ដែលបានចាប់ផ្តើមការឈ្លានពានរបស់ខ្លួនលើអ៊ុយក្រែនកាល​ពី​ជាង ៤ឆ្នាំមុន បានផ្ដល់​ហេតុផល​ថា ការវាយប្រហារទាំងនោះ គឺជាការសងសឹក និងកំណត់គោលដៅលើ​ទីតាំងដែលមាន​ទំនាក់​ទំនង​ជាមួយយោធា និងកន្លែងផលិតថាមពល​ដែល​គាំទ្រកងទ័ពអ៊ុយក្រែន៕