ប្រភពស្និទ្ធនឹងមូល​និធិ​រូបិយវត្ថុ​អន្តរជាតិ​ (IMF) បាននិយាយនៅ​ថ្ងៃព្រហស្បតិ៍ថា មន្ត្រីអ៊ីរ៉ាក់បានទាក់​ទង​ស្ថាប័ន​ផ្ដល់​ប្រាក់កម្ចី​ដ៏​ធំ​នេះ ដើម្បី​​ទទួលបានជំនួយហិរញ្ញវត្ថុ ដោយសារតែផល​ប៉ះពាល់បី​ជម្លោះនៅតំបន់​មជ្ឈិមបូព៌ា។

ប្រភពនោះ​បាន​និយាយ​ថា ការសន្ទនាដំបូងបានធ្វើឡើងកាលពីខែមុន ក្នុងអំឡុងពេលមាន​កិច្ចប្រជុំនិទាឃរដូវរបស់ IMF និងធនាគារពិភពលោក នៅទីក្រុងវ៉ាស៊ីនតោន សហរដ្ឋ​អាមេរិក ហើយការពិភាក្សា កំពុងបន្តអំពីចំនួនទឹកប្រាក់ដែលអ៊ីរ៉ាក់ត្រូវការ និងរបៀបដែលប្រាក់កម្ចីណាមួយ នឹងត្រូវបានរៀបចំឡើង។

សង្គ្រាមដែលបានចាប់ផ្តើមកាលពី​ថ្ងៃទី២៨ ខែកុម្ភៈ ជាមួយនឹងយុទ្ធនាការទម្លាក់គ្រាប់បែកដ៏ធំរបស់សហរដ្ឋអាមេរិក-អ៊ីស្រាអែល លើ​អ៊ីរ៉ង់ និងការ​បង្កឲ្យ​មានការបិទច្រកសមុទ្រ Hormuz របស់ទីក្រុងតេអេរ៉ង់ បានធ្វើ​ឲ្យ​តំបន់​មជ្ឈិមបូព៌ាទាំងមូលរង្គោះរង្គើ​ ដោយនាំ​ឲ្យ​ខូចខាតដល់ហេដ្ឋារចនាសម្ព័ន្ធ និងសេដ្ឋកិច្ច​។

អ៊ីរ៉ាក់បានរងផលប៉ះពាល់យ៉ាងធ្ងន់ធ្ងរ​ដោយសារសង្គ្រាមនេះ​ ដោយ​​ភាគច្រើន​​ការនាំចេញប្រេងរបស់ខ្លួន ដែល​តំណាងឲ្យ​ប្រាក់ចំណូលរដ្ឋាភិបាលស្ទើរតែទាំងអស់ ត្រូវបានកាត់ផ្តាច់ដោយការបិទផ្លូវទឹកដ៏សំខាន់ ដែលមានប្រេងឆៅប្រហែល ១ភាគ៥ របស់ពិភពលោកឆ្លង​កាត់​ នៅមុន​នោះ​។

មិនមានការអត្ថាធិប្បាយណាមួយភ្លាមៗពី IMF ឬស្ថានទូតអ៊ីរ៉ាក់ឡើយ​។ យោងតាមគេហទំព័ររបស់ IMF បាន​ឲ្យ​ដឹង​ថា កិច្ចព្រមព្រៀងហិរញ្ញវត្ថុចុងក្រោយរបស់អ៊ីរ៉ាក់ជាមួយ IMF គឺជាកិច្ចព្រមព្រៀងបម្រុងចំនួន ៣,៨ពាន់លានដុល្លារ ដែលផុតកំណត់នៅក្នុងខែកក្កដា ឆ្នាំ២០១៩ ដែលក្នុងនោះ ១,៤៩ពាន់លានដុល្លារត្រូវបានដកចេញ​៕