លោក Marco Rubio រដ្ឋមន្ត្រីការបរទេសអាមេរិក បាននិយាយកាលពីថ្ងៃព្រហស្បតិ៍ ​​១៤​​ឧសភា ​សប្ដាហ៍នេះ​ថា ក្នុងអំឡុងពេលកិច្ចប្រជុំកំពូលនៅប្រទេសចិន លោកប្រធានាធិបតី Trump និងមន្ត្រីរដ្ឋបាល អាមេរិក​ ​នឹងព្យាយាមបញ្ចុះបញ្ចូលប្រធានាធិបតីចិន លោក Xi Jinping ឱ្យដើរតួនាទីសកម្មក្នុងការចរចាដើម្បីបញ្ចប់សង្គ្រាមជាមួយអ៊ីរ៉ង់ និងបើកច្រកសមុទ្រ Hormuz ឡើងវិញ។​

ថ្លែងទៅកាន់លោក Sean Hannity អ្នកសម្របសម្រួល​កម្មវិធីព័ត៌មាន​របស់​ទូរទស្សន៍​​ Fox News នៅទីក្រុងប៉េកាំង លោក Rubio បានកត់សម្គាល់ថា ការរឹតបន្តឹងរបស់អ៊ីរ៉ង់ និងសហរដ្ឋអាមេរិកលើការដឹកជញ្ជូននៅក្នុងតំបន់ ​​ក៏បានប៉ះពាល់ដល់ប្រទេសចិនផងដែរ។​

លោករដ្ឋមន្ត្រីការបរទេសអាមេរិក​រូបនេះ​​​បានថ្លែង​ថា ​ចិនមាននាវា​ជាប់នៅក្នុងឈូងសមុទ្រពែ​ក្ស​ ព្រោះការបង្កើតប្រព័ន្ធមួយ ដែលនិយាយថា ពួកលោក​​នឹងអនុញ្ញាតឱ្យនាវា​​មួយចំនួនឆ្លងកាត់ ប៉ុន្តែនាវា​ផ្សេងទៀតមិនអាច​ឆ្លងកាត់​បាន​ វាងាយស្រួលនិយាយជាងធ្វើ ដោយសំដៅទៅលើគោលនយោបាយដែលបានបញ្ជាក់របស់យោធាអ៊ីរ៉ង់ទាក់ទងនឹងនាវា​នៅក្នុងច្រកសមុទ្រ Hormuz។

យោងតាមរបាយការណ៍ខែមីនាពីគណៈកម្មការពិនិត្យសេដ្ឋកិច្ច និងសន្តិសុខអាមេរិក-ចិន ដែល​ជា​​គណៈកម្មការសភាឯករាជ្យមួយ ​បាន​ឲ្យដឹងថា​​​ ការទិញរបស់ចិនមានចំនួនប្រហែល៩០​​%នៃប្រេងនាំចេញពីអ៊ីរ៉ង់ ។ ​​

កងទ័ពជើងទឹកសហរដ្ឋអាមេរិកបានរារាំងនាវា​នានា​មិនឱ្យចាកចេញពីកំពង់ផែអ៊ីរ៉ង់អស់រយៈពេលជាងមួយខែមកហើយ ​​និង​​បានរារាំងល្បឿន​​​​​ឧស្សាហកម្មនាំចេញប្រេងរបស់ទីក្រុងតេអេរ៉ង់៕