ប្រធានាធិបតីគុយបា លោក Miguel Diaz-Canel បាននិយាយថា ទីក្រុងឡាហាវ៉ាន នឹងទទួលយកជំនួយមនុស្សធម៌ពីសហរដ្ឋអាមេរិក ប្រសិនបើវាត្រូវបានផ្តល់ឲ្យស្របតាមការអនុវត្តដែលទទួលស្គាល់ជាអន្តរជាតិ។ ប៉ុន្តែលោកបាននិយាយបន្ថែមថា ប្រសិនបើគោលដៅ ពិតជាដើម្បីបន្ធូរបន្ថយទុក្ខលំបាករបស់ប្រជាជនគុយបាមែននោះ សហរដ្ឋអាមេរិកធ្វើឲ្យកាន់តែប្រសើរ គួរដកចេញទណ្ឌកម្មពាណិជ្ជកម្មរបស់ខ្លួនលើប្រទេសកោះមួយនេះ។

ការថ្លែងលើកឡើងរបស់លោកប្រធានាធិបតី បានធ្វើឡើងនៅក្នុងការបង្ហោះនៅលើបណ្តាញផ្សព្វផ្សាយសង្គមកាលពីថ្ងៃព្រហស្បតិ៍ មួយថ្ងៃបន្ទាប់ពីសហរដ្ឋអាមេរិក បានផ្តល់ជំនួយមនុស្សធម៌ចំនួន១០០លានដុល្លារដល់ប្រទេសគុយបា។ លោក Diaz-Canel បានសរសេរថា «ប្រសិនបើរដ្ឋាភិបាលសហរដ្ឋអាមេរិកពិតជាមានឆន្ទៈក្នុងការផ្តល់ជំនួយក្នុងបរិមាណដែលខ្លួនបានប្រកាស និងស្របតាមការអនុវត្តមនុស្សធម៌ដែលត្រូវបានទទួលស្គាល់ជាសកល អាមេរិកនឹងមិនជួបឧបសគ្គ និងមានការដឹងគុណពីប្រទេសគុយបា»។

ទោះជាយ៉ាងណា ការផ្តល់ជំនួយ បានកើតឡើងដោយមានលក្ខខណ្ឌថា ស្ថាប័នរដ្ឋាភិបាលគុយបា «ត្រូវធ្វើកំណែទម្រង់ដែលមានប្រយោជន៍»។ លោក Diaz-Canel បានពិពណ៌នាអំពីការផ្តល់ជំនួយនេះ ថាជារឿងផ្ទុយស្រឡះ ដោយផ្តល់នូវអ្វីដែលលោកហៅថាការដាក់ទណ្ឌកម្ម «ជាប្រព័ន្ធ និងឃោរឃៅ» ដែលដាក់ដោយរដ្ឋាភិបាលសហរដ្ឋអាមេរិក លើប្រជាជនគុយបា។ លោកបានសរសេរថា «ផលប៉ះពាល់ អាចត្រូវបានកាត់បន្ថយតាមរបៀបកាន់តែងាយស្រួល និងឆាប់រហ័សជាងមុន តាមរយៈការដកចេញទណ្ឌកម្ម ឬបន្ធូរបន្ថយការបិទផ្លូវ »។

ចាប់តាំងពីទសវត្សរ៍ឆ្នាំ១៩៦០មក ប្រទេសគុយបា ស្ថិតនៅក្រោមបម្រាមពាណិជ្ជកម្មយ៉ាងទូលំទូលាយពីសហរដ្ឋអាមេរិក ជាប្រទេសជិតខាងជិតស្និទ្ធបំផុតមួយរបស់ខ្លួន។