យោងតាមលោក Melvin Matibag ប្រធានការិយាល័យ​ស៊ើបអង្កេត​​ជាតិ​ហ្វីលីពីន (NBI)​បានឲ្យដឹងថា ខ្មាន់កាំភ្លើងម្នាក់ដែលត្រូវបានចោទប្រកាន់ថាបានបាញ់ប្រហារនៅអគារព្រឹទ្ធសភាកាលពីយប់ថ្ងៃពុធ ទី១៣ ឧសភា សប្ដាហ៍នេះ ​​​គឺ​​​ជាអ្នកបើកបរស្ម័គ្រចិត្តសម្រាប់ការិយាល័យស៊ើបអង្កេតជាតិ។ ​​

លោក Matibag បានបញ្ជាក់កាលពី​​ថ្ងៃព្រហស្បតិ៍១៤ ឧសភា ថា បុរស​ខ្មាន់​កាំភ្លើង​ឈ្មោះ​​​ Mel Oragon អាយុ ៤៤ ឆ្នាំ ពុំ​​មែនជាបុគ្គលិកផ្លូវការរបស់ការិយាល័យ​ស៊ើបអង្កេត​​ជាតិ​ NBI ទេ ​ គេគ្រាន់តែ​ជា​អ្នកស្ម័គ្រចិត្ត។លោកបានពន្យល់ថាជនល្មើស​ Oragon គ្រាន់តែបម្រើការជាអ្នកបើកបររថយន្ត​​​សម្រាប់ក្រុមភ្នាក់ងារមួយក្រុមដែលបានទៅកាន់អគារ​ការិយាល័យ​ប្រព័ន្ធធានារ៉ាប់រងសេវារដ្ឋាភិបាល(​GSIS)ក្នុង​ទីក្រុង​ Pasay តាមការបញ្ជារបស់ប្រធាន និងជាអ្នកគ្រប់គ្រងទូទៅរបស់ស្ថាប័ន​ GSIS លោក Wick Veloso ប៉ុណ្ណោះ។​​

យោងតាមលោក Matibag បានឱ្យដឹងថា ការិយាល័យស៊ើបអង្កេតជាតិ​​​ បានជួលកម្លាំង ឬអ្នកស្ម័គ្រចិត្ត​ក្នុងប្រតិបត្តិការរបស់ខ្លួន ដើម្បីបំពេញបន្ថែមកង្វះបុគ្គលិក។

នគរបាល​​​​​ស្រុក​​​ភាគខាងត្បូង ចាត់ទុក​បុរស​​​ Oragon ជាជនសង្ស័យក្នុងភាពចលាចលនៅព្រឹទ្ធសភា ដែលបង្កឱ្យមានការភ័យស្លន់ស្លោ និងភាពវឹកវរក្នុងចំណោមសមាជិកព្រឹទ្ធសភា អ្នកសារព័ត៌មាន និងបុគ្គលិក។

យោងតាមរបាយការណ៍ដែលបានផ្ញើទៅកាន់សារព័ត៌មាន​ The Philippine STAR ​​ជនល្មើស​ ​Oragon បានបាញ់កាំភ្លើងជាច្រើនគ្រាប់នៅខាងក្នុងអគារព្រឹទ្ធសភាដោយប្រើកាំភ្លើងដែលមិនទាន់កំណត់ទំហំ។ មិនយូរប៉ុន្មាន រូបគេ​​ត្រូវបានចាប់ខ្លួនដោយសមាជិកនៃក្រុមសន្តិសុខព្រឹទ្ធសភាដែលត្រូវបានចាត់តាំងនៅក្នុងបរិវេណនោះ។ក្រុម​​​អាជ្ញាធរនៅតែកំពុងប្រមូលភស្តុតាងដើម្បីកំណត់ពីចេតនារបស់ជនសង្ស័យ។ ក្រុមស៊ើបអង្កេតបានរកឃើញសំបកគ្រាប់កាំភ្លើងជាច្រើ​ន​​ ​ពីប្រភេទ​​កាំភ្លើងវែង​​​​ ​៥,៥៦​ មីលីម៉ែត្រ​​​​​ និងកាំភ្លើងខ្លីទំហំ ​៩ ​​​មីលីម៉ែត្រ។​​

ប្រធានាធិបតីហ្វីលីពីន បានបញ្ជាឲ្យបើកកិច្ចប្រជុំបន្ទាន់មួយរបស់មន្ត្រីជាន់ខ្ពស់ កាលពីថ្ងៃព្រហស្បតិ៍ ដដែលក្នុងពេលមានភាពតានតឹងផ្នែកនយោបាយកាន់តែខ្លាំង ​ពោល​គឺមួយថ្ងៃបន្ទាប់ពីស្នូរកាំភ្លើងនៅព្រឹទ្ធសភា ជាទីដែលសមាជិកសភាមួយរូប​ ដែល​តុលាការព្រហ្មទណ្ឌអន្តរជាតិ (ICC) កំពុង​តាមចាប់ខ្លួន​ ​បានទៅសម្ងំលាក់ខ្លួននៅក្នុងនោះ​ដោយសារខ្លាចមានការចាប់ខ្លួន​៕