ព្យុះដ៏កំណាចដែលបានវាយប្រហារពាសពេញរដ្ឋឧតា ប្រទេស (Uttar Pradesh ) ភាគខាងជើងរបស់ប្រទេសឥណ្ឌា នៅសប្ដាហ៍នេះ បានបណ្ដាលឲ្យអ្នកស្លាប់បន្តកើនឡើងរហូតដល់យ៉ាងណាស់១១៧ នាក់ ខណៈតាមស្រុកភូមិជាច្រើន រាយការណីចំនួនអ្នកស្លាប់ និងរងរបួស។

កម្លាំងព្យុះដ៏ខ្លាំងក្លា លាយឡំជាមួយផ្គររន្ទះ និងភ្លៀងធ្លាក់ បានវាយប្រហាររដ្ឋនេះកាលពីថ្ងៃពុធ១៣ឧសភា សប្ដាហ៍នេះ ដោយបានវាយបំប៉ើងដំបូលផ្ទះ និងអគារ ជាច្រើនព្រមទាំងផ្ដួលរំលំដើមឈើទាំងឬសគ្របសង្កត់លើផ្លូវមួយចំនួន។
រដ្ឋ Uttar Pradesh ដែលជាផ្ទះសម្រាប់ប្រជាជនឥណ្ឌាជាង២៤០លាននាក់ ជាញឹកញាប់តែងត្រូវបានវាយប្រហារដោយព្យុះនានា អំឡុងរដូវក្ដៅប៉ុន្មានខែ មុនភ្លៀងមូសុងចូលមកដល់ ដោយមានរន្ទះបាញ់ដែលជាធម្មតាបណ្ដាលឲ្យមានការបាត់បង់អាយុជីវិតមនុស្ស។
ការិយាល័យផ្ដល់ជំនួយ ដែលជាទីភ្នាក់ងារផ្ដល់ជំនួយរបស់រដ្ឋ ដំបូងឡើយបាននិយាយថាកាលពីថ្ងៃទី១៣ខែឧសភា សប្ដាហ៍នេះ មនុស្សចំនួន៨៩នាក់បានស្លាប់ និង៧២នាក់រងរបួស ទន្ទឹមនឹងផ្ទះសម្បែងជាង២០០ខ្នងបានខូចខាត ។
យោងតាមការចេញផ្សាយរបាយការណ៍នៅក្នុងកាសែត Hindu នៅថ្ងៃសុក្រ ១៥ឧសភា សប្ដាហ៍នេះ ការិយាល័យខាងលើ បានធ្វើបច្ចុប្បន្នភាពចុងក្រោយ ដោយអ្នកស្លាប់បានឡើងដល់១១៧ នាក់ ៕


