លោក Hans Grundberg បេសកជនអង្គការសហប្រជាជាតិប្រចាំប្រទេសយេម៉ែន បានប្រកាសកាលពី ថ្ងៃព្រហស្បតិ៍ថា ភាគីជម្លោះរបស់ប្រទេសនេះ បានយល់ព្រមដោះលែងអ្នកជាប់ឃុំឃាំងដែលទាក់ទងនឹងជម្លោះជាង ១.៦០០នាក់ បន្ទាប់ពីការចរចារយៈពេល ១៤សប្តាហ៍ នៅប្រទេសហ្ស៊កដានី ដែលលោកបានពិពណ៌នាថា ជាកិច្ចព្រមព្រៀងដោះលែងអ្នកទោសច្រើនបំផុត ចាប់តាំងពីសង្គ្រាមបានចាប់ផ្តើម។

ជម្លោះយេម៉ែន បានផ្ទុះឡើងនៅឆ្នាំ ២០១៤ នៅពេលដែលកងជីវពលហ៊ួទីដែលមានសម្ព័ន្ធភាពជាមួយ អ៊ីរ៉ង់បានដណ្តើមយករដ្ឋធានី Sanaa ដោយបង្ខំឲ្យរដ្ឋាភិបាលដែលទទួលស្គាល់ដោយអន្តរជាតិរត់គេច ខ្លួន។

លោកបេសកជនUN បាននិយាយថា កិច្ចព្រមព្រៀងនេះ បានបង្ហាញថា «សូម្បីតែក្នុងចំណោមការមិនទុកចិត្តគ្នាយ៉ាងធ្ងន់ធ្ងរ និងជម្លោះដ៏អូសបន្លាយក៏ដោយ ការសន្ទនានៅតែអាចផ្តល់លទ្ធផល» ដោយបន្ថែមថា កិច្ចព្រមព្រៀងនេះ បានផ្តល់ក្តីសង្ឃឹម និងការធូរស្បើយដល់ប្រជាជនរាប់ពាន់គ្រួសារដែលបានរង់ចាំយូរពេក ដោយអ្នកខ្លះរង់ចាំជាងមួយទសវត្សរ៍ សម្រាប់ការដោះលែងសាច់ញាតិរបស់ពួកគេ»។

លោកបានសរសើរក្រុមគ្រួសាររបស់អ្នកជាប់ឃុំឃាំងចំពោះកិច្ចខិតខំប្រឹងប្រែងតស៊ូមតិរបស់ពួកគេ ដោយនិយាយថា «សមិទ្ធផលថ្ងៃនេះ ក៏ជារបស់ពួកគេដែរ»។

លោក Grundberg បានពិពណ៌នាអំពីការចរចានេះថា «មានភាពស្មុកស្មាញយ៉ាងខ្លាំង» ដោយនិយាយថា ភាគីនានាបានបន្តការពិភាក្សាពេញមួយខែបុណ្យរ៉ាម៉ាដន បុណ្យអ៊ីដ (Eid) និងមួយរយៈពេលនៃភាពតានតឹងក្នុងតំបន់កាន់តែខ្លាំងឡើង៕