ក្រុមមនុស្សធម៌របស់អង្គការសហប្រជាជាតិ បាននិយាយកាលពីថ្ងៃព្រហស្បតិ៍ថា ទោះបីជាមានបទឈប់បាញ់ជិតមួយខែក៏ដោយ ការវាយប្រហារដែលប៉ះពាល់ដល់ជនស៊ីវិល និងអ្នកឆ្លើយតបជួរមុខ នៅក្នុងប្រទេសលីបង់ នៅតែបន្តត្រូវបានរាយការណ៍ជារៀងរាល់ថ្ងៃ។

ដោយដកស្រង់តួលេខរបស់អាជ្ញាធរលីបង់ ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) បានរាយការណ៍ថា ការវាយប្រហារដោយយានដ្រូនជាបន្តបន្ទាប់លើរថយន្ត នៅក្នុងតំបន់ Jiyeh មានចម្ងាយប្រហែល ២០ គីឡូម៉ែត្រភាគខាងត្បូងនៃរដ្ឋធានីបេរូត បានសម្លាប់មនុស្សយ៉ាងហោចណាស់ ៨នាក់ ក្នុងនោះមានកុមារពីរនាក់ កាលពីថ្ងៃពុធ។

OCHA បាននិយាយថា យោងតាមក្រសួងសុខាភិបាលសាធារណៈលីបង់ យ៉ាងហោចណាស់មនុស្ស ២.៨៩៦នាក់ ត្រូវបានសម្លាប់ ក្នុងនោះមានកុមារ ២០០នាក់ និងជាង ៨.000នាក់ បានរងរបួស ចាប់តាំងពីការកើនឡើងភាពតានតឹងចុងក្រោយ នៅថ្ងៃទី ០២ ខែមីនា។

ការិយាល័យនេះ បានបញ្ជាក់ថា ចំនួនមនុស្សដែលត្រូវបានផ្លាស់ទីលំនៅចេញពីផ្ទះរបស់ពួកគេ ក៏បន្តកើនឡើងទូទាំងប្រទេសផងដែរ បន្ទាប់ពីស្ថានភាពសន្តិសុខកាន់តែយ៉ាប់យ៉ឺន។ មនុស្សជិត ១៣០.000 នាក់កំពុងជ្រកកោន នៅក្នុងជម្រករួមចំនួន ៦៣២៕